भिवापूर पोलीस स्टेशन मध्ये ‘महिलाराज’

भिवापूर : जागतिक महिला दिनाचे औचित्य साधत भिवापूर पोलीस स्टेशनमध्ये सोमवारी ‘महिलाराज’ पाहायला मिळाले. एकदिवसीय ठाणेदार म्हणून पोलीस कर्मचारी दुर्गा शंभरकर यांनी यशस्वीरीत्या सूत्रे सांभाळली. वाहतूक पोलीस ते स्टेशन डायरी पोलीस स्टेशनचा असा अख्खा कारभारच महिलांनी सांभाळला. एवढेच नव्हे तर अवैध वाहतूक करणाऱ्या आरोपींच्या मुसक्याही त्यांनी आवळल्या.

उपविभागीय पोलीस अधिकारी भीमराव टेळे यांच्या मार्गदर्शनात पोलीस निरीक्षक महेश भोरटेकर यांनी महिला दिनानिमित्त सोमवारी पोलीस स्टेशनमध्ये विविध कार्यक्रमाचे आयोजन केले होते. यावेळी ठाणेदार भोरटेकर यांनी पोलीस हवालदार दुर्गा शंभरकर यांना एकदिवसीय ठाणेदार म्हणून पोलीस स्टेशनची सूत्रे सोपविली. शिवाय तालुक्यातील सर्व महिला पोलीस पाटील यांना पोलीस स्टेशनमध्ये निमंत्रित करण्यात आले होते. यावेळी भेटवस्तू देऊन त्यांचा सत्कार करण्यात आला. जागतिक महिला दिनानिमित्त गृहमंत्री अनिल देशमुख यांचे शुभेच्छा पत्र महिला पोलीस पाटील व पोलीस कर्मचाऱ्यांना देण्यात आले.

एकदिवसीय ठाणेदार दुर्गा शंभरकर यांच्या नेतृत्वात महिला पोलिसांनी सायंकाळच्या सुमारास राष्ट्रीय मार्गावरील सिनेमा टॉकीज परिसरात दारूची अवैध वाहतूक करणाऱ्या आरोपीच्या मुसक्या आवळल्या. यात २,८०० रुपयाच्या दारूसह आरोपी अजय गणपत पराते (३५) यास अटक करण्यात आली. कारवाई करणाऱ्या पथकात ठाणेदार दुर्गा शंभरकर, ज्योत्स्ना कारेमोरे, मीरा केंद्रे, मंगला जाधव, पूजा इंगळे, मृणाल चाके, कविता समर्थ, दीपमाला जाधव, नगमा शेख, अर्चना मुट्टलवार, निलक्षा नेवारे आदीचा सहभाग होता

-

शांतता व सुव्यवस्था अबाधित ठेवण्यासाठी पोलीस स्टेशनचा प्रत्येक कर्मचारी कटिबद्ध आहे. जागतिक महिला दिनी महिलांच्या कार्याचा गौरव व्हावा, या उद्देशाने पोलीस अधीक्षक राकेश ओला व उपविभागीय पोलीस अधिकारी भीमराव टेळे यांच्या मार्गदर्शनात पोलीस स्टेशनमध्ये विविध उपक्रम राबविल्या गेले. प्रत्येक क्षेत्रात महिला मातृशक्तीचे योगदान महत्त्वाचे आहे. त्यामुळे केवळ महिला दिनी महिलांचा सन्मान मर्यादित न राहता, प्रत्येक दिवशी प्रत्येक वेळी महिलांचा सन्मान व्हायलाच पाहिजे, हाच उद्देश पोलीस विभागाचा आहे.

- महेश भोरटेकर, पोलीस निरीक्षक, भिवापूर