बिबट्याचे कातडे जप्त

चौघांना अटक : चिपळूणमध्ये सापळा रचून पोलिसांची कारवाई

चिपळूण : शहरात गुहागर बायपास मार्गावर बिबट्याचे कातडे विक्रीसाठी येणार असल्याची माहिती चिपळूण पोलिसांना मिळाली आणि लागलीच सापळा रचून पोलिसांनी बिबट्याच्या कातड्यासह चार तरुणांना ताब्यात घेतले. ही कारवाई रविवारी रात्री १०.३० वाजता करण्यात आली. आरोपींना न्यायालयात हजर केले असता त्यांना ६ दिवसांची पोलीस कोठडी सुनावली.
बिबट्याच्या कातड्याची विक्री होणार असल्याची माहिती मिळाल्यानंतर सहाय्यक पोलीस निरीक्षक आनंद कोकरे, पोलीस उपनिरीक्षक अविनाश मते, हवालदार गणेश नाले, गगनेश पटेकर, सुशांत कांबळे यांनी सापळा रचला. एक बोगस गिऱ्हाईक पाठवण्यात आले. पाच लाखांच्या आमिषाने अमोल सखाराम पालकर (३९, रा. पंडववाडी- पिंपळी खुर्द), मुनावर शहाबाज खान (२६, रा. वेहळे) व सुनील कृष्णा जड्याळ (रा. कासे, ता. संगमेश्वर) हे बिबट्याचे कातडे घेऊन आले. त्याचवेळी पोलिसांनी त्यांना रंगेहाथ पकडले.हा बिबट्या सुधाकर नेवरेकर (२६, रा. मुर्तवडे- कातळवाडी) याने मारल्याचे या आरोपींनी सांगितल्यामुळे पोलिसांनी नेवरेकर यालाही तत्काळ ताब्यात घेतले. मुर्तवडे कझर येथे ५ ते ६ महिन्यांपूर्वी आपण रात्री बिबट्याची शिकार केल्याचे त्याने पोलीस निरीक्षक प्रमोद मकेश्वर यांच्या समोर कबूल केले. हा बिबट्या पूर्ण वाढ झालेला होता. त्याचे वय ५ ते ६ वर्षे असावे, असे फिरत्या पथकाचे परिक्षेत्र वन अधिकारी शहाजी पाटील यांनी सांगितले.
वन खात्याचे परिक्षेत्र वन अधिकारी जी. एन. कोल्हे, भरारी पथकाचे परिक्षेत्र वनअधिकारी शहाजी पाटील, वनपाल आर. बी. पताडे, राजश्री कीर, वनरक्षक तौफिक मुल्ला, एम. जी. पाटील, जितेंद्र बारशिंग यांच्या ताब्यात कातडे देण्यात आले आहे. रितसर पंचनामा केल्यानंतर वन्यजीव संरक्षण कायदा १९७२ अन्वये गुन्हा दाखल केला आहे. संशयितांना दि. २१ पर्यंत पोलीस कोठडी सुनावली. (प्रतिनिधी)++++


मुर्तवडेच्या तरुणाने केली शिकार
पूर्ण वाढ झालेल्या बिबट्याची शिकार करणारा सुधाकर हा मुर्तवडेचे माजी उपसरपंच बबन नेवरेकर यांचा मुलगा असून ते सातत्याने शिकार करतात. आपल्याला बॅटरीच्या प्रकाशझोतात ९ बिबटे दिसले. एक बिबट्या आपल्या दिशेने आला. त्याच्यावर आपण बार काढला व आपण झाडावर चढलो. यासाठी मार्गताम्हाणे येथील एका व्यक्तीची १२ बोअरची बंदूक आपण वापरल्याचेही सुधाकर याने सांगितले. नेवरेकर सराईत शिकारी असल्यानेच त्याने दोन काडतुसाच्या सहाय्याने हा बिबट्या मारला. एक गोळी बिबट्याच्या पोटावर तर दुसरी त्याच्या पायात घुसल्याचे कातड्यावरुन दिसते.