मंडळ अधिकाऱ्यासह काेतवालास जीवे मारण्याची धमकी

लाेकमत न्यूज नेटवर्क

कामठी : महसूल विभागाच्या मंडळ अधिकारी व काेतवालाने रेती वाहतुकीचा ट्रक थांबवून राॅयल्टीची मागणी केली असता, ट्रकचालकाने दाेघांनीही शिवीगाळ करत जीवे मारण्याची धमकी दिली आणि रेती राेडवर टाकून ट्रक घेऊन पळ काढला. ही घटना कामठी (नवीन) पाेलीस ठाण्याच्या हद्दीतील आवंढी-साेनेगाव (राजा) मार्गावर शुक्रवारी (दि. १७) दुपारी ३ वाजताच्या सुमारास घडली.

राज्य शासनाने पावसामुळे रेतीच्या उपशावर बंदी घातली असताना कामठी तालुक्यातील कन्हान नदीच्या पात्रातून माेठ्या प्रमाणात रेतीचा अवैध उपसा व वाहतूक अव्याहतपणे सुरूच आहे. महसूल विभागाचे मंडळ अधिकारी संजय दशरथ कांबळे (५३) व कोतवाल मंगेश दामोदर चंदनखेडे (३५, रा. आवंढी, ता. कामठी) हे दाेघेही शुक्रवारी दुपारी आवंढी शिवारात खरीप पिकांच्या आणेवारीसाठी गेले हाेते. त्यांना आवंढी-साेनेगाव (राजा) मार्गावर एमएच-४०/बीएल-६९३९ क्रमांकाचा ट्रक येताना दिसला.

संशय आल्याने दाेघांनीही हा ट्रक थांबवून ट्रकची पाहणी केली. त्यात रेती आढळून येताच ट्रकचालकास रेती वाहतुकीच्या राॅयल्टीची मागणी केली. ट्रकचालकाने दाखविलेली राॅयल्टी बनावट असल्याचे लक्षात येताच संजय कांबळे यांनी त्याल विचारणा करत रेतीसह ट्रक तहसील कार्यालयाच्या आवारात जमा करण्याची सूचना केली. संजय कांबळे यांच्या सूचनेवरून मंगेश चंदनखेडे ट्रकच्या केबिनमध्ये बसले व कामठीच्या दिशेने निघाले.

दरम्यान, ट्रकचालकाने मध्येच आवंढी- गादा राेडवर ट्रक थांबविला व शिवीगाळ करत मंगेश चंदनखेडे यास काॅलर पकडून धक्काबुक्की केली व त्यांना ट्रकखाली उतरून देत जीवे मारण्याची धमकी दिली. त्यानंतर त्याने ट्रकमधील रेती राेडवर टाकून ट्रकने नागपूरच्या दिशेने पळ काढला. याप्रकरणी कामठी (नवीन) पाेलिसांनी ट्रकचालक सत्यवान याच्या विराेधात भादंवि ३५३, ३७९, २८३, ३४ अन्वये गुन्हा दाखल केला असून, या घटनेचा तपास पोलीस उपनिरीक्षक गीता रासकर करत आहेत.

...

रेतीची खुलेआम चाेरी

सध्या रेतीघाट बंद असले तरी कन्हान नदीच्या पात्रातून राेज शेकडाे ब्रास रेतीचा अवैध उपसा केला जात असून, ती रेती चाेरून नेली जात आहे. याबाबत महसूल व पाेलीस विभागातील अधिकाऱ्यांना माहिती असून, या रेतीचाेरीत राजकीय नेत्यांचा सहभाग असल्याने दबावापाेटी अधिकारी रेती तस्करांवर कारवाई करत नाही. रेती तस्करांनी अधिकाऱ्यांसाेबत आर्थिक संबंधही प्रस्थापित केले आहेत. त्यामुळे रेती तस्करांची हिंमत वाढल्याने असले प्रकार घडत आहेत.

...

कामठी तालुक्यातील कन्हान नदीवरील बिना, नेरी, उनगाव, साेनेगाव (राजा), चिकना तसेच काेलार नदीवरील वारेगाव रेती घाटांतून कुणी रेतीचा अवैध उपसा करत असले तर त्यांची गय केली जाणार नाही. चाेरट्यांवर कठाेर प्रशासकीय कारवाई केली जाईल.

- अक्षय पाेयाम,

तहसीलदार, कामठी.