काशीरामचा सांगाडा मिळाला

देव्हाडी येथील काशीराम कुकडे यांच्या हत्या प्रकरणी शुक्रवारी सकाळी ११.३० च्या सुमारास रेल्वे तलावातून मृत काशिरामचा सांगाडा मिळाला. आरोपींनी दाखविलेल्या स्थळाच्या मदतीने पोलिसांनी

२९ पर्यंत पीसीआर : प्रकरण बंद घरातील मानवी अवशेषाचे

तुमसर (जि.भंडारा) : देव्हाडी येथील काशीराम कुकडे यांच्या हत्या प्रकरणी शुक्रवारी सकाळी ११.३० च्या सुमारास रेल्वे तलावातून मृत काशिरामचा सांगाडा मिळाला. आरोपींनी दाखविलेल्या स्थळाच्या मदतीने पोलिसांनी तलावातील तीन ठिकाणाहून विखुरलेल्या स्थितीतील हाडे हस्तगत केली. ही हाडे ३० ते ३५ टक्केच आहेत. फेब्रुवारी २०१३ मध्ये फावड्याने काशिरामचा खून करण्यात आला. घर तलाव परिसरात असल्यामुळे दलदल असून केव्हाही पडण्याची भीती होती. त्यामुळे घरात पुरलेल्या काशीरामच्या मृतदेहाची अन्यत्र विल्हेवाट लावण्याची योजना मोतीराम व शीलाने आखली होती. त्यानुसार, जून २०१३ मध्ये पावसाळ्यापूर्वी शीला, मोतीराम व संतोषने जमिनीत पुरलेला मृतदेह बाहेर काढला. त्यावेळी सांगाडा तेवढा शिल्लक होता. शरीरावरील मास गळाल्याने तुकड्यांमध्ये असलेला सांगाडा पॉलिथीनमध्ये भरून रेल्वे तलावात फेकून देण्यात आला. मात्र ज्या ठिकाणी काशिरामला पुरण्यात आले होते तिथे हाताची दोन हाडे आणि पंजाची हाडे मातीत फसून राहिली होती. बंद घरातून जमिनीत पुरलेली मानवी हाडे आढळून आल्यानंतर तुमसर पोलिसांनी तपासाची चक्रे वेगाने फिरवित मृतकाच्या पत्नीसह तीनही जणांना जेरबंद केले. आज सकाळी ११ वाजताच्या सुमारास आरोपींनी सांगितलेल्या तलाव परिसरात मृतदेहाचा शोध घेण्यात आला. तलावात पाणी असून मोठ्या प्रमाणात गाळ आहे. तीन वेगवेगळ्या ठिकाणाहून हाडे गोळा करण्यात आली. यात छातीच्या बरगड्या, फुटलेली कवटी, हाता-पायाची हाडे व अन्य अवयव आढळले. मिळालेली हाडे नागपूर येथील प्रयोगशाळेत पाठविण्यात आली आहेत. तसेच डीएनए चाचणीसाठी मृतकाचा मुलगा सुरज काशिराम कुकडे याच्या रक्ताचे नमुनेही लॅबमध्ये पाठविण्यात आले आहेत. दरम्यान, या प्रकरणात तुमसर पोलिसांनी मृतकाची पत्नी शीला काशिराम कुकडे, मेहूणा संजय मोतीराम पंचबुद्धे, मुलगा संतोष काशिराम कुकडे यांना अटक करुन भादंवि ३०२ (खून करणे), २०१ (पुरावा नष्ट करणे) कलमान्वये गुन्हे दाखल केले आहेत. तीनही आरोपींना तुमसर न्यायालयाने दि. २९ मे पर्यंत पोलीस कोठडी सुनावली आहे. (तालुका प्रतिनिधी) काशीरामचा मेहुणा संजय पंचबुद्धे, मुलगा संतोष कुकडे यांना अटक करण्यात आली आहे.