योगेश पांडे
नागपूर : नियंत्रण रेषा ओलांडून पाकिस्तानात पोहोचलेल्या सुनीता हिला अटक करण्यासाठी कारगिल पोलिस नागपूरला पोहोचले. पोलिस तिला सुनीताला अटक करून कारगिलला घेऊन जाणार आहे. तेथे तिची हेरगिरीच्या संशयावरून चौकशी करण्यात येईल.
सुनीता १४ मे रोजी नियंत्रण रेषा ओलांडून पाकिस्तानी हद्दीत घुसली. ती गिलगिटमध्ये पाकिस्तानी नागरिक झुल्फिकारला भेटणार होती. याआधी तिला पाकिस्तानी रेंजर्सनी पकडले होते. चौकशीनंतर तिला बीएसएफच्या ताब्यात देण्यात आले. बीएसएफने तिला अमृतसर पोलिसांच्या स्वाधीन केले होते. ४ मे रोजी कपिलनगर येथील रहिवासी सुनीता तिच्या मुलासह बेपत्ता झाल्यानंतर तिच्याविरुद्ध बेपत्ता झाल्याची तक्रार दाखल करण्यात आली होती. अमृतसर पोलिसांनी तिच्याविरुद्ध गुन्हा दाखल केला होता आणि तपास कपिलनगर पोलिसांकडे वर्ग केला होता.
या प्रकरणात कपिलनगर पोलिसांनी २८ मे रोजी सुनीताला ताब्यात घेतले होते. पोलीस कोठडी संपल्यानंतर तिला कारागृहात पाठविण्यात आले होते. चौकशीदरम्यान पाकिस्तानातील गिलगिट येथील रहिवासी झुल्फिकारसोबत स्टोन व्यवसायाबद्दल चर्चा करण्यासाठी नियंत्रण रेषा ओलांडल्याचा दावा तिने केला होता. यापूर्वी नोव्हेंबर २०२४ आणि मार्च २०२५ मध्येही तिला नियंत्रण रेषा ओलांडताना पकडले होते. सुनीताने दोन तासांत खडतर प्रवास पूर्ण केल्याने एनआयए व लष्कराच्या ती रडारवर आहे.म्हणूनच सर्वांनी नियंत्रण रेषा ओलांडण्याबाबतचे सत्य जाणून घेण्यासाठी सुनिताची चौकशी करण्याचे ठरवले आहे. या संदर्भात, लडाख पोलिसांचे पथक मंगळवारी नागपूरला पोहोचले. तिला ताब्यात घेण्यासाठी त्यांचा एक पोलीस उपनिरीक्षक, दोन महिला आणि एक पुरुष कर्मचारी आले आहेत. त्यांनी न्यायालयात प्रोडक्शन वॉरंटसाठी अर्ज केला. बुधवारी प्रोडक्शन वॉरंट मिळाल्यानंतर, सुनिताला चौकशीसाठी कारगिलला नेले जाईल.