‘गाईड’विनाच अभयारण्यात जंगल सफारी

उमरेड : उमरेड-पवनी-कऱ्हांडला अभयारण्यात शुक्रवारी जंगल सफारी करण्यासाठी ‘गाईड’ला सोबतीला न देताच जंगल सफारी केल्या गेल्याचा प्रकार समोर आला आहे. गाईडविनाच जंगल सफारी झाल्याने पर्यटकांचा हिरमोड बघावयास मिळाला. कऱ्हांडला गेटवर कार्यरत गाईड संपावर गेल्याने पर्यटकांची निराशा झाली. सदर अभयारण्यातील महत्त्वपूर्ण कऱ्हांडला गेटवर एकूण २८ गाईड कार्यरत आहेत. तीन महिन्यापासून सतीघाट तलाव आणि रानबोडी परिसर बंद ठेवण्यात आले आहे. अन्य दोन मार्गावर वाहने धावतात. या मार्गावर पर्यटकांना वन्यप्राणी दिसत नाहीत. यामुळे सतीघाट आणि रानबोडी परिसर पर्यटकांसाठी सुरू करण्यात यावा, अशी स्थानिक महाराष्ट्र राज्य गाईड युनियनची मागणी आहे.

याबाबत अनेकदा विभागीय वन अधिकारी (वन्यजीव) आर. बी. गवई यांच्याशी गाईड युनियनने चर्चासुद्धा केली. गवई याप्रकरणी कोणतेही उत्तर देत नाहीत असा आरोप युनियनचा आहे. शिवाय ऑनलाईन वाहन रद्द झाल्यानंतर स्पॉटवर ऑफलाईन नोंदणी घेतली जात नाही, असाही आरोप युनियनच्या वतीने करण्यात आला आहे. पूर्वी या गेटवरून २० गाड्या सोडल्या जात होत्या. यामध्ये १८ ऑनलाईन आणि दोन गाड्या व्हीआयपी असायच्या. आता या गाड्यांची संख्यासुद्धा कमी करण्यात आली आहे. सध्या केवळ १२ गाड्या ऑनलाईन आणि दोन गाड्या व्हीआयपींच्या आहेत. सदर समस्येकडे वन्यजीव विभागाने लक्ष न दिल्यास आंदोलन अधिक तीव्र करण्याचा इशारा सी. एस. गेडाम, एल. एस. मांढरे, पंकज ठक्कर, विद्याधन उके, नितीन वाढई, विकास सवाईमुल, नितीन वाढई, स्वप्निल ठक्कर आदींसह संपूर्ण गाईडनी दिला आहे.