नागपूर : एका ३५ वर्षीय व्यक्तीचा त्याच्याच मित्राने जीव घेण्याचा प्रयत्न केला. आरोपी मित्राने इतर सहकाऱ्यांच्या मदतीने फिर्यादीच्या पोटावर चाकूने वार करत जीव घेण्याचा प्रयत्न केला. मात्र पोटावरील चाकूचा वार मांडीवर बसला. वाठोडा पोलीस ठाण्याच्या हद्दीत ही घटना घडली.
नजीम उर्फ खलील उर्फ ताजीम खान (३५, बाबा फरीदनगर) असे तक्रारदाराचे नाव आहे. सोमवारी दुपारी चार वाजताच्या सुमारास नजीमला त्याचा मित्र शेख इक्बाल शेख अन्वर (४२, निराला सोसायटी, मोठा ताजबाग) याचा फोन आला. त्याने नजीमला चकोले वाडी रोड, खरबी येथे बोलविले. नजीम तेथे पोहोचला असता तेथे शेख इक्बालसोबत मंगल रमेश श्रीवास्तव (२८, नवनाथ नगर, खरबी), प्रफुल्ल उर्फ पक्या ताराचंद चौधरी (२८, दिघोरी) हे उपस्थित होते. त्यांनी नजीमला शेख इक्बाल व कल्लू नावाच्या व्यक्तीमध्ये झालेल्या भांडणाबाबत विचारणा केली. मल काहीही माहिती नाही असे नजीमने सांगितले असता मंगलने त्याच्या पोटावर चाकूने वार केले.
समयसूचकता दाखवून नजीम पलटल्याने मांडीला चाकू लागला. त्यानंतर नजीमने तेथून पळ काढण्याचा प्रयत्न केला. मात्र पक्याने पकडून ठेवले होते. शेख इक्बालने नजीमच्या मांडीवर व दोन्ही पायांवर चाकूने वार करत जीव घेण्याचा प्रयत्न केला. त्यानंतर आरोपी फरार झाले. नजीमला मेडिकल इस्पितळात दाखल करण्यात आले असून प्रकृती गंभीर आहे. नजीमच्या तक्रारीवरून तीनही आरोपींविरोधात वाठोडा पोलीस ठाण्यात गुन्हा नोंदविण्यात आला आहे. पोलिसांनी तीनही आरोपींना अटक केली आहे.