वडिलांच्या छत्रछायेत आजही बरसतात अखंड स्वरधारा

नागपूर : लहानपणी समजायला लागले तेव्हापासून वडिलांचे आणि आजोबांचे गायन ऐकत मोठी झाले. स्वरज्ञान मिळाले. वयाच्या दहाव्या वर्षी गायला लागले. आजही गातच असते. सोबत वडिलांचेही गुरूच्या रूपाने मार्गदर्शन असते. खरंच मी तर स्वत:ला फारच भाग्यवान समजते. ही प्रतिक्रिया आहे, विदर्भातील प्रसिद्ध गायिका साधना शिलेदार यांची!

‘फादर्स डे’च्या निमित्ताने ‘लोकमत’शी बोलताना त्या म्हणाल्या, आपले वडीलच गुरू असणे आणि त्यांच्या छत्रछायेत आपल्या कलेचा विस्तार करणे, ही मोठी भाग्याची गोष्ट असते. त्या भाग्याचा वाटा आपणाला मिळाला. वडील विवेक गोखले हे अमरावतीला सुप्रसिद्ध गायक आणि चित्रकार होते. चित्रकारितेपेक्षा त्यांचे गायनात नाव मोठे होते. ते तत्त्वज्ञानाचे प्राध्यापकही होते. त्यांचे वडील म्हणजे आपले आजोबा नारायणराव गोखले उपाख्य नानासाहेब हेदेखील प्रख्यात चित्रकार आणि गायक होते. बालगंधर्वांची पदे ते गायचे. ही गायनकला वडिलांमध्ये व आत्यामध्ये आली. वडिलांकडून ही कला वारसाहक्काने आपणास मिळाली. आजोबा आणि वडिलांकडून गायनातले बारकावे शिकता आले. सौंदर्यशास्त्राच्या अंगाने गायन आणि गाण्याबद्दलचा विचार त्यांनी शिकवला. लहानपणी काऊचिऊच्या गोष्टी ऐकत घास भरवण्याऐवजी वडील-आजोबांची गाणी ऐकवत आईने भरवले. संस्कार रुजले, स्वरज्ञान पक्के झाले.

आता वडिलांचे वय ७९ वर्षे आहे. आम्ही सारी मंडळी घरात एकत्रच नागपुरात असतो. सकाळ, सायंकाळ, सुटीचा दिवस आमच्याकडे स्वरांची बरसात असते. त्या स्वरानंदात आम्ही आजही चिंब होत असतो. वडिलांनी कधी बंधन लादले नाही. त्यांच्यात विचारांची मोकळीकता आहे. मी त्यांची मुलगी आणि शिष्या असूनही स्वत:च्या पीएच.डी.साठी गाइड म्हणून त्यांनी माझी निवड केली. त्या म्हणतात, वैचारिक प्रगल्भता यापेक्षा अजून किती मोठी शकते!