कारमधून देशीदारूची अवैध वाहतूक

लाेकमत न्यूज नेटवर्क

पाटणसावंगी : सावनेर पाेलिसांच्या पथकाने नागपूर-सावनेर मार्गावरील पाटणसावंगी (ता. सावनेर) शिवारातील रेल्वे क्राॅसिंगजवळ केलेल्या कारवाईमध्ये देशीदारूची अवैध वाहतूक करणारी कार पकडली. यात तिघांना अटक करण्यात आली असून, त्यांच्याकडून एकूण ९ लाख ४६ हजार ८०० रुपये किमतीचा मुद्देमाल जप्त केला. ही कारवाई गुरुवारी (दि. १५) सायंकाळी ५.३० वाजताच्या सुमारास करण्यात आली.

राहुल बाबाराव सहारे (३२, रा. रमाईनगर, काेराडी, ता. कामठी), सलमान नजीर खान (३०, रा. नागपूर) व प्रकाश लक्ष्मण तांबे (२१, रा. गाैतमनगर, छावणी, कामठी), अशी अटक करण्यात आलेल्या आराेपींची नावे आहेत. सावनेर पाेलिसांचे पथक गस्तीवर असताना त्यांना नागपूरच्या दिशेने दारूची वाहतूक केली जात असल्याची माहिती मिळाली हाेती. त्यामुळे पाटणसावंगी येथील खापा मार्गावर असलेल्या रेल्वे क्राॅसिंगजवळ नाकाबंदी करून त्यांनी वाहनांची तपासणी करायला सुरुवात केली.

यात पाेलिसांनी एमएच-४०/बीजे-७३०६ क्रमांकाची कार थांबवून झडती घेतली. त्या कारच्या डिक्कीत देशीदारूच्या १५ पेट्या आढळून आल्याने पाेलिसांनी कागदपत्रांची तपासणी केली. ती दारूची अवैध वाहतूक असल्याचे चाैकशीत स्पष्ट हाेताच, पाेलिसांनी कारमधील तिघांना अटक केली आणि त्यांच्याकडून नऊ लाख रुपयाची कार व ४६ हजार ८०० रुपये किमतीची देशीदारू असा एकूण ९ लाख ४६ हजार ८०० रुपये किमतीचा मुद्देमाल जप्त केला, अशी माहिती ठाणेदार मारुती मुळूक यांनी दिली. याप्रकरणी सावनेर पाेलिसांनी गुन्हा नाेेंदवून तपास सुरू केला. ही कारवाई सहायक पाेलीस निरीक्षक निशांत फुलेकर, हवालदार कृष्णा जुनघरे, कुमेरिया, बांबल, काेल्हे यांच्या पथकाने केली.