इफ्रा खान ‘जेईई-मेन्स’मध्ये अव्वल

नागपूर : ‘आयआयटी’सह देशातील महत्त्वाच्या अभियांत्रिकी महाविद्यालयांमध्ये प्रवेशासाठी घेण्यात येणाऱ्या ‘जेईई-मेन्स’च्या फेब्रुवारी महिन्याच्या परीक्षेचा निकाल लागला. अनेक विद्यार्थ्यांनी मार्चच्या तिसऱ्या संधीसाठी तयारी सुरू केली आहे. प्राप्त झालेल्या माहितीनुसार इफ्रा खान हिने ९९.९९ पर्सेंटाईल ‘स्कोअर’ प्राप्त करत उपराजधानीतून अव्वल स्थान पटकाविले आहे. शहरातील ५० हून अधिक विद्यार्थ्यांचा ‘स्कोअर’ हा ९९ पर्सेंटाईलहून अधिक आहे.

ऋषभसिंह गहरवारने ९९.९७ पर्सेंटाईलचा ‘स्कोअर’ मिळविला. तर यश कवाडे (९९.९५ पर्सेंटाईल), आयुष श्रीवास्तव (९९.९३ पर्सेंटाईल) पार्थ कस्तुरे (९९.९१ पर्सेंटाईल), मुकेश भोजवानी (९९.९० पर्सेंटाईल) यांनी देखील यश मिळविले.

‘एनटीए’तर्फे १६ ते १८ मार्चदरम्यान परीक्षा घेण्यात आली होती. ‘कोरोना’चा प्रकोप अद्यापही कायम असल्याने ‘ऑनलाईन’ माध्यमातून ही परीक्षा झाली. नागपूर तसेच विदर्भातील विविध महाविद्यालयांतून ७ हजारांहून अधिक विद्यार्थ्यांनी नागपुरातून ‘जेईई-मेन्स’ दिली.

आणखी दोन संधी बाकी

९५ हून अधिक पर्सेंटाईलचा ‘स्कोअर’ असूनदेखील विद्यार्थी आणखी नव्या जोमाने पुढील परीक्षा देण्यासाठी तयारी करत आहेत. नव्या नियमांनुसार विद्यार्थ्यांना उपलब्ध करून देण्यात आलेल्या चार प्रयत्नांपैकी ही दुसरी परीक्षा होती. आता आणखी दोन प्रयत्न विद्यार्थी देऊ शकतात. यानंतर २७ ते ३० एप्रिल आणि २४ ते २८ मे या काळात परीक्षा देण्याच्या चार संधी मिळणार आहेत. बहुतांश विद्यार्थ्यांनी एप्रिलच्या टप्प्याकडे लक्ष केंद्रित केले आहे.