लोकमत-मनसेच्या रक्तदान शिबिरात दात्यांची शंभरी

- शिवकालीन तुतारीने वाढविला जोश : तरुणांचा रक्तदानासाठी उत्साह

लोकमत न्यूज नेटवर्क

नागपूर : स्वातंत्र्य संग्राम सेनानी व लोकमतचे संस्थापक संपादक स्व. जवाहरलाल दर्डा यांच्या जयंतीच्या पर्वावर राज्यभरात सुरू असलेल्या ‘लोकमत रक्ताचं नातं’ या रक्तसंकलन महायज्ञात बुधवारी लोकमत व महाराष्ट्र नवनिर्माण सेनेच्या वतीने दीनदयालनगर येथील राधेमंगलम सभागृहात रक्तदान शिबिर पार पडले. या शिबिरात शंभर रक्तदात्यांनी आपले कर्तव्य बजावत रक्तदानाचे राष्ट्रीय कर्तव्य पार पाडले आणि नागरिकांना रक्तदानासाठी प्रोत्साहित केले.

सकाळी १० वाजेपासून सुरू झालेल्या या रक्तदान शिबिराचे उद्घाटन ऑरेंज सिटी हॉस्पिटलचे संचालक डॉ. अनुप मरार, लोकमतच्या नागपूर आवृत्तीचे कार्यकारी संपादक श्रीमंत माने, लाईफ लाईन ब्लड बँकेचे डॉ. हरीश वरभे व मनसेचे सरचिटणीस हेमंत गडकरी यांच्या हस्ते करण्यात आले. यावेळी शिवकालीन पद्धतीने तुतारीच्या गगनभेदी ललकारीने स्वागत झाले आणि रक्तदात्यांमध्ये जोश संचारला. तद्नंतर छत्रपती शिवाजी महाराज, डॉ. बाबासाहेब आंबेडकर व जवाहरलाल दर्डा यांच्या प्रतिमेला माल्यार्पण करण्यात आले आणि शिबिरास प्रारंभ करण्यात आला. शिबिरात ८१ रक्तदात्यांनी रक्तदानाचे कर्तव्य पार पाडले तर १९ दात्यांनी थेट ब्लड बँकेत जाऊन आपले कर्तव्य पार पाडले आणि शिबिरातून शंभर रक्तदात्यांचे उद्दिष्ट पूर्ण करण्यात आले. यावेळी मनसेचे शहर अध्यक्ष अजय ढोके व विशाल बडगे, जिल्हा संघटक सचिन धोटे, जिल्हा अध्यक्ष किशोर सरायकर व सतीश कोल्हे, महिला सेना शहर अध्यक्ष मनीषा पापडकर व संगीत सोनटक्के, विद्यार्थी सेनेचे आदित्य दुरगकर यांच्यासह अचला मेसन, उमेश बोरकर, महेश माने, शशांक गिरडे, अनिकेत दहिकर, पंकज खिच्ची, योगेश चनापे, कादर नान्ने, उमेश उतखेडे, राहुल वंजारी, दुर्गेश साकुळकर, अनिल पारखी, विपीन धोटे, मनीषा पराड, पराग भिलकरे, गौरव पुरी, समीर, सपन, शेषराव भाकरे, दीपक ठाकरे उपस्थित होते.

..................