लोकमत न्यूज नेटवर्कनागपूर : कोंबडीने एकाच्या घरात शिरून दोन शेजाऱ्यांमध्ये वाद वाढवला. हा वाद एवढा विकोपाला गेला की एकाने दुसऱ्यावर तलवारीने हल्ला चढवून त्याला गंभीर जखमी केले. जरीपटका पोलीस ठाण्याच्या हद्दीत रविवारी सकाळी ९ च्या सुमारास ही घटना घडली.समतानगरातील उन्नती कॉलनीत राजेंद्र रमाशंकर यादव (वय ४२) आणि मुन्ना कटरे आजूबाजूला राहतात. त्यांच्यात छोट्या छोट्या कारणावरून कुरबूर सुरू राहते. रविवारी सकाळी ९ च्या सुमारास आरोपी मुन्नाची कोंबडी यादवच्या घरात शिरली. यादवने तिला हुसकावून लावले. त्यामुळे मुन्ना कटरे, त्याची पत्नी आणि दोन मुली घराबाहेर आल्या. कोंबडीला पळवून का लावले, असे विचारत त्यांनी यादवसोबत वाद घातला. वाद वाढत गेला आणि आरोपी मुन्नाने तलवार काढून यादववर हल्ला चढवला. त्याच्या डोक्यावर, हातावर जोरदार वार केले. या हल्ल्यात यादव गंभीर जखमी झाला. आरडाओरड ऐकून आजूबाजूची मंडळी धावली. त्यांनी आरोपी कटरेला कसेबसे आवरले. जखमी यादवला डॉक्टरकडे नेण्यात आले. जरीपटका पोलिसांना माहिती कळविण्यात आली. पोलिसांनी यादव यांची तक्रार नोंदवून घेत आरोपी मुन्ना कटरे, त्याची पत्नी आणि दोन मुलीविरुद्ध गुन्हा दाखल केला.