गोदरेज आनंदम फ्लॅटधारकांचा कोट्यवधी रुपये भरपाईचा दावा

नागपूर : गणेशपेठ येथील गोदरेज आनंदम वर्ल्ड सिटी टाऊनशीपमधील फ्लॅटधारकांच्या आनंदम टॉवर ‘सी’ को-ऑपरेटिव्ह हाऊसिंग सोसायटीचे अध्यक्ष सुनील चिरानिया यांनी कोट्यवधी रुपये भरपाई मिळण्यासह विविध मागण्यांसाठी राष्ट्रीय ग्राहक तक्रार निवारण आयोगात तक्रार दाखल केली आहे. त्यात आयोगाने गोल्डब्रिक्स इन्फ्रास्ट्रक्चर व गोदरेज प्रॉपर्टी कंपनीला नोटीस बजावून ३० दिवसात उत्तर सादर करण्याचे निर्देश दिले आहेत.

गोल्डब्रिक्स इन्फ्रास्ट्रक्चर व गोदरेज प्रॉपर्टी कंपनीने गोदरेज आनंदम वर्ल्ड सिटी टाऊनशीपचे मार्केटिंग करण्यासाठी आकर्षक माहितीपत्रक छापले होते. तसेच, नागरिकांचे डोळे दिपवणाऱ्या जाहिराती केल्या होत्या. प्रकल्पामध्ये ग्रॅन्ड वॉटर बॉडी, सनराईज डेक, ट्रिविया कोर्ट, क्लब हाऊस, स्विमिंग पूल, बॅडमिंटन कोर्ट, ट्री कोर्ट, पॅव्हिलियन, प्लन्टर्स, किडस् झोन, ॲम्फिथिएटर, लॅन्डस्केप ट्री, कमर्शियल प्लाझा, क्रिकेट पीच, टेनिस कोर्ट, वुडन डेक, ॲमेनिटीज एरिया इत्यादी आधुनिक सुविधा पुरविण्याचे आश्वासन दिले होते. त्याला भूलून तक्रारकर्त्यांनी २०१२ ते २०१६ या कालावधीत प्रकल्पातील फ्लॅट खरेदी केले. दरम्यान, कंपन्यांना फ्लॅटची संपूर्ण किंमत अदा केली. परंतु, कंपन्यांनी ठराविक वेळेत प्रकल्पाचे काम पूर्ण केले नाही. फ्लॅटधारकांना अद्यापही सर्व सुविधा उपलब्ध करून देण्यात आल्या नाहीत. क्लब हाऊसकरिता प्रत्येक फ्लॅटधारकांकडून १ ते ३ लाख रुपये घेण्यात आले. परंतु, क्लब हाऊसचे बांधकाम पूर्ण करण्यात आले नाही. फ्लॅटधारकांकडून २०० रुपये चौरस फुटाप्रमाणे एकमुस्त देखभाल खर्च घेण्यात आला. त्यापैकी १५० रुपये चौरस फूट या प्रमाणे रक्कम परत करण्याचे आश्वासन देण्यात आले होते. त्याचेही पालन करण्यात आले नाही असे तक्रारकर्त्यांचे म्हणणे आहे. तक्रारकर्त्यांच्या वतीने ॲड. गिरीश कुंटे व ॲड. अनुभव मार्डीकर यांनी कामकाज पाहिले.

-----------------

तक्रारकर्त्यांच्या मुख्य मागण्या

१ - कंपन्यांनी प्रकल्पातील सर्व सुविधांचे काम पूर्ण करावे.

२ - संपूर्ण प्रकल्प निर्धारित वेळेत पूर्ण करण्यात यावा.

३ - क्लब हाऊसकरिता घेतलेल्या रकमेवर मासिक २ टक्के व्याज द्यावे.

४ - संस्थेच्या ३३ सदस्यांना प्रत्येकी ३० लाख रुपये भरपाई अदा करावी.

५ - पार्किंग, बेसमेंट, ओपन एरियामधील सांडपाण्याची गळती थांबवावी.