दिग्गज नेत्यांनी तळ ठोकला

नगर परिषदेच्या निवडणुकीत प्रथमच या क्षेत्राचे खासदार, आमदार, माजी केंद्रीय मंत्री, माजी मंत्री तसेच स्थानिक नेत्यांनी त्यांच्या त्यांच्या पक्षाकडून

काटोलमध्ये चुरस वाढली : निवडणुकीतील प्रचाराने तापलेय वातावरण
विजय कडू  काटोल
नगर परिषदेच्या निवडणुकीत प्रथमच या क्षेत्राचे खासदार, आमदार, माजी केंद्रीय मंत्री, माजी मंत्री तसेच स्थानिक नेत्यांनी त्यांच्या त्यांच्या पक्षाकडून उमेदवार भक्कमपणे निवडणूक रिंगणात उतरविले आहेत; सोबतच हे दिग्गज नेते काटोलमध्ये तळ ठोकून आहेत. एवढेच काय तर विद्यमान केंद्रीय मंत्री, मुख्यमंत्री, पालकमंत्री यांच्या प्रचारसभांचा सपाटा सुरू झालेला आहे. त्यामुळे या निवडणुकीची रंगत वाढली आहे.
काटोलमध्ये नगराध्यक्षपदासाठी ९ तर २३ नगरसेवकपदासाठी ११४ उमेदवार निवडणूक रिंगणात आहेत. भाजपकडून आमदार डॉ. आशिष देशमुख, विदर्भ माझाकडून माजी नगराध्यक्ष चरणसिंग ठाकूर, शेकापकडून माजी नगराध्यक्ष राहुल देशमुख यांच्यात चुरस महत्त्वाची असली तरी, राज्याचे माजी मंत्री अनिल देशमुख आणि माजी केंद्रीय मंत्री सुबोध मोहिते यांनी अनुक्रमे राष्ट्रवादी काँग्रेस व काँग्रेस पक्षाची धुरा सांभाळून उमेदवारांच्या प्रचारात रंगत आणली आहे. २०११ ते २०१६ दरम्यान राहुल देशमुख यांची सत्ता असली तरी, त्यापूर्वी सलग १० वर्षे व आता गेल्या सहा महिन्यांपासून चरणसिंग ठाकूर यांची भाजपच्या मदतीने नगर परिषदेत सत्ता आहे.
दोन महिन्यांपूर्वी झालेल्या नगर परिषद पोटनिवडणुकीत नऊपैकी सात जागा भाजपने जिंकल्या. दरम्यान, भाजपचे आ. डॉ. आशिष देशमुख व चरणसिंग ठाकूर यांच्यात बेबनाव झाल्याने ठाकूर यांनी विदर्भ माझा पक्षाच्या तिकिटवर आपले उमेदवार निवडणूक रिंगणात उतरविले. विदर्भ माझाकडून नगराध्यक्षपदासाठी वैशाली ठाकूर, भाजपकडून डॉ. प्रेरणा बारोकर, शेकापकडून अर्चना देशमुख, राष्ट्रवादीकडून रेणुका डेहनकर, काँग्रेसने नव्या दमाच्या उमेदवार म्हणून आशा चरडे यांना निवडणूक रिंगणात उतरविले आहे.

प्रचार जोरात
प्रभागांतर्गत विविध पक्षांच्या नेत्यांनी आपल्या उमेदवारासाठी प्रचार सुरू केला असून कॉर्नर सभांचा सपाटा लावला आहे. शहराच्या दोन-तीन चौकात व प्रचार सभेच्या ठिकाणी स्क्रीन लावून उमेदवारांच्या भाषणांच्या आॅडिओ-व्हिडिओ क्लिप लावल्या जात आहेत. शहरात नव्यानेच सुरू झालेल्या इलेक्ट्रॉनिक चॅनलने तर धम्माल उडविली आहे. प्रत्येक उमेदवार, त्यांच्या पक्षाचे नेते यांना बोलते करून प्रचारात रंगत भरली आहे.

पक्षीय बलाबल असे
मागील सार्वत्रिक निवडणुकीत पाच प्रभागातून शेतकरी कामगार पक्षाचे १३ आणि चरणसिंग ठाकूर व अनिल देशमुख यांच्या कुंतलापूर विकास आघाडीचे ८ असे एकूण २१ नगरसेवक निवडून आले होते. परंतु सहा महिन्यांपूर्वी शेकापच्या तत्कालीन नगराध्यक्षांसह नऊ नगरसेवकांना अपात्र ठरविल्याने पोटनिवडणूक झाली. त्यात भाजपचे सात तर शेकापचे दोन नगरसेवक निवडून आले. त्यामुळे सध्यास्थितीत शेकापचे तीन नगरसेवक आहेत.

४४ केंद्रावर मतदान
काटोल नगर परिषद निवडणुकीत १६३८४ पुरुष, १५४४० महिला आणि ३ तृतीयपंथी असे एकूण ३१८२७ मतदार हे मतदानाचा हक्क बजावणार आहेत. एकूण ४४ केंद्र असून ८ जानेवारीला मतदान होत आहे. याकरिता ४८ मतदान केंद्राधिकारी, १४७ कर्मचारी असे एकूण १९५ अधिकारी - कर्मचारी कर्तव्य बजावणार असल्याचे निवडणूक निर्णय अधिकारी अर्चना पठारे, सहायक निवडणूक निर्णय अधिकारी जुम्मा प्यारेवाले यांनी सांगितले. याशिवाय नगर परिषदेचे अविनाश बरसे, मनोज जवंजाळ, नामदेव बारई हेसुद्धा कार्यरत आहेत.