सीआरपीएफ जवानांसोबत साधला गडकरींनी संवाद

नागपूर : केंद्रीय मार्ग व परिवहन मंत्री नितीन गडकरी यांनी शनिवारी केंद्रीय रिझर्व सुरक्षा दलाच्या हिंगणा येथील कॅम्पवर जाऊन जवानांसोबत आणि त्यांच्या कुटुंबीयांसोबत संवाद साधला. पर्यावरण संवर्धनाच्या दिशेने या केंद्रावरून करण्यात येत असलेल्या उपक्रमाची त्यांनी प्रशंसा केली. सीआरपीएफने ४५ हजार वृक्षलागवडीला संकल्प केला आहे. येथील वृक्षारोपण आणि जलसंवर्धनाचे कार्य उत्तम असल्याची पावती त्यांनी दिली.

या भेटीदरम्यान, गडकरी यांनी सीआरपीएफ कॅम्प परिसरात आयोजित शहीद हिंगोले गंगाराम किशन को-ऑपरेटिव्ह कॉपरेटिव्ह शॉपचे उद्घाटन केले. समारंभाला आ. समीर मेघे व महापौर दयाशंकर तिवारी, सीआरपीएफचे डीआयजी प्रशांत जांभुळकर प्रामुख्याने उपस्थित होते. गडकरी म्हणाले, व्हीआयपी लोकांच्या सुरक्षेसाठी सीआरपीएफचे जवान खडा पहारा देतात. त्यांना टोल नाक्यावर सूट मिळण्यासाठी प्रयत्न करण्याचे आश्वासन दिले. ग्रीन नागपूरचे स्वप्न साकार करण्यासाठी नागपूरला जल, वायु व ध्वनी प्रदूषणापासून दूर ठेवण्याची गरज आहे. सीआरपीएफ गेट ते शिवणगाव इसासनी पर्यंत सिमेंट रोड बांधकामासाठी २५ कोटी रुपयांच्या तरतुदीला मंजुरी मिळाल्याची घोषणा त्यांनी केली. संचालन सहायक कमांडर आशुतोष कुमार यांंनी केले.

या दरम्यान, डीआयजी आय. लोकेंद्र सिंह, डीआयजी (मेडिकल) डॉ. संतोष कुमार मिश्रा, कमांडंट सुभाष चंद्र, करुण राय, उप कमांडंट संजय कुमार निर्मल, राहुल भसारकर, संकल्प मिश्रा, जनसंपर्क अधिकारी ग्रुप केंद्र प्रदीप द्विवेदी प्रामुख्याने उपस्थित होते.