फ्लॅट विक्रीच्या नावावर ३ कोटींनी फसवणुक

नागपूर : फ्लॅट स्कीमच्या नावावर बिल्डर जावई आणि मेव्हण्याने ३ कोटींनी फसवणुक केल्याची घटना उघडकीस आली असून धंतोली पोलिसांनी दोघांविरुद्ध गुन्हा दाखल केला आहे.

गिरीश मोतीलाल जायसवाल (५८) आणि अजय कृष्णमोहन जायसवाल (५०) अशी आरोपींची नावे आहेत. गिरीश जायस्वाल आणि त्यांचा मेव्हणा अजयने वर्धा मार्गावर साई मंदिराजवळ अष्टविनायक प्लानर्स अँड डेव्हलपर्सच्या नावाने कार्यालय सुरू केले. त्यांनी २०१३ मध्ये गौसी मानापूरमध्ये फार्म सिटीच्या नावाने फ्लॅट स्कीम तयार केली. या स्कीममधील फ्लॅटची नागरिकांना विक्री केली. अंगदसिंह सोलंकीसह १९ नागरिकांनी या स्कीममध्ये फ्लॅटचे बुकिंग केले. त्यांनी २०१३ ते २०१५ दरम्यान ३ कोटी रुपये आरोपींना दिले. आरोपींनी २४ ते ३६ महिन्यात फ्लॅटचा ताबा देण्याचे आश्वासन दिले होते. निर्धारीत वेळ झाल्यानंतर सोलंकी आणि इतर गुंतवणूकदारांनी फ्लॅटचा ताबा मागितला. परंतु आरोपी टाळाटाळ करू लागले. फ्लॅटचा ताबा न मिळाल्यामुळे गुंतवणूकदार पैसे परत करण्याचा तगादा लावत होते. आरोपी पैसे परत करण्यासाठी टाळाटाळ करीत होते. गुंतवणूकदारांनी याबाबत तक्रार दाखल केली. तपासानंतर धंतोली पोलिसांनी फसवणूक, बांधकाम, विक्री व्यवस्थापन आणि हस्तांतरण अधिनियम १९६३ नुसार गुन्हा दाखल केला. पीडितांव्यक्तिरिक्त अनेक नागरिकांनी आरोपींकडून फ्लॅट आणि प्लॉट खरेदी केल्याची माहिती आहे. गुन्हा दाखल झाल्यानंतर आणखी पीडित समोर येण्याची शक्यता आहे.

...............