विकास कामांची कालमर्यादा पाळा ()

विभागीय आयुक्त पदाचा कार्यभार स्वीकारला

लोकमत न्यूज नेटवर्क

नागपूर : जनतेच्या प्रश्नांना प्राधान्य देऊन ते सोडविण्यासाठी महसूल यंत्रणेच्या माध्यमातून मिळणारा प्रतिसाद महत्त्वाचा आहे. त्यासाठी विकास कामांची कालमर्यादा पाळा, अशा सूचना नव्या विभागीय आयुक्त प्राजक्ता लवंगारे-वर्मा यांनी दिल्यात.

नागपूर विभागाचे विभागीय आयुक्त म्हणून बुधवारी पदभार स्वीकारल्यानंतर त्यांनी आयुक्तालयातील वरिष्ठ अधिकाऱ्यांची बैठक घेतली. विभागनिहाय आढावा घेतला. यावेळी अधिकाऱ्यांशी संवाद साधताना त्या बोलत होत्या. महसूल विभाग हा शासनाचा चेहरा असून अधिकारी व कर्मचाऱ्यांनी दैनंदिन कामामधून जनतेला अधिक लोकाभिमुख व परिणामकारक प्रशासन देण्याला प्राधान्य द्यावे. कोरोना काळात नागपूर विभागाने अत्यंत उत्कृष्ट पद्धतीने नियोजन केले होते. त्यामुळे कोरोनाचा प्रादुर्भाव कमी करण्यास मदत झाली. नैसर्गिक आपत्तीच्या काळातही अशाच पद्धतीने विभागात काम करण्याची आवश्यकता आहे. अधिकाऱ्यांनी सोपवलेल्या कामाच्या वेळा निश्चित करुन त्या कालमर्यादेत सोडविण्याला प्राधान्य द्यावे, असे निर्देशही यावेळी त्यांनी दिले.

विभागीय आयुक्तालय हे नियंत्रण अधिकाऱ्याच्या भूमिकेत न राहता जिल्हास्तरीय यंत्रणेला पूरक म्हणून काम करण्यासाठी सर्व अधिकारी व कर्मचाऱ्याने स्वयंस्फूर्तीने पुढाकार घेण्यासोबतच केवळ जिल्ह्यातून आलेल्या अहवालावर विसंबून न राहता शेवटच्या घटकाकडून मिळणारा प्रतिसाद यावर अधिक काम करण्याची आवश्यकता असल्याचेही त्यांनी बैठकीत सांगितले.

या बैठकीत अतिरिक्त आयुक्त संजय धिवरे, महसूल उपायुक्त मिलिंद साळवे, उपायुक्त चंद्रभान पराते, शैलेंद्र मेश्राम, धनंजय सुटे, अंकुश केदार, रमेश आडे, श्रीमती राजलक्ष्मी शहा, श्रीमती रेश्मा माळी तसेच सहाय्यक आयुक्त व विभाग प्रमुख यावेळी उपस्थित होते.