स्पेसवूड कंपनीतील आग धूमसतच

लाेकमत न्यूज नेटवर्क

हिंगणा : एमआयडीसी परिसरातील स्पेसवूड नामक फर्निचरच्या कंपनीला मंगळवारी (दि. २९) सायंकाळी ४ वाजताच्या सुमारास आग लागली. जिल्ह्यातील आठ ठिकाणचे अग्निशमन दल ही आग विझवण्याचे अविरत प्रयत्न करीत असून, २४ तासानंतर ती नियंत्रणात आली असली तरी पूर्णपणे विझली नाही. या आगीत अंदाजे २०० काेटी रुपयांचे नुकसान झाल्याची माहिती एमआयडीसी व्यवस्थापनाने दिली.

हिंगणा एमआयडीसी परिसरात विवेक देशपांडे व किरीट जाेशी यांची स्पेसवूड नामक कंपनी असून, त्यात फर्निचर तयार केले जाते. या कंपनीच्या आवारात सर्वत्र प्लायवूड व लाकडाचा भुसा तसेच तुकडे असल्याने कार्यालय परिसरातील शेडमध्ये लागलेली आग सर्वत्र पसरत गेली. या आगीवर नियंत्रण मिळविण्यासाठी सुरुवातीला एमआयडीसी व नंतर नागपूर महानगरपालिका, वाडी नगर परिषद व डिफेन्सच्या अग्निशमन दलाला पाचारण करण्यात आले. मंगळवारी रात्री उशिरापर्यंत ही आग नियंत्रणात येत नसल्याचे लक्षात येताच जिल्ह्यातील काटाेल, कळमेश्वर, सावनेर व नरखेड नगर परिषदेच्या अग्निशमन दलाला पाचारण करण्यात आले.

या सर्वांनी आग विझविण्यासाठी अथक प्रयत्न सुरू केले. ही आग पसरत गेल्याने त्यात कंपनीतील पाचही प्राॅडक्शन युनिट पूर्णपणे जळाले. केवळ कंपनीचे कार्यालय सुरक्षित राहिले आहे. ही आग बुधवारी रात्रीपर्यंत नियंत्रणात आली असली तरी ती पूर्णपणे विझली नव्हती. यात कंपनीचे अंदाजे २०० काेटी रुपयांचे नुकसान झाल्याची माहिती एमआयडीसी व्यवस्थापनाने दिली. ही आग नेमकी कशामुळे लागली, हे मात्र अद्यापही कळू शकले नाही.