नरेश डोंगरे
नागपूर : रेल्वे प्रवासात एका चिमुकल्याने बर्थवर सू-सू केल्याच्या कारणामुळे संतप्त झालेल्या तिघांनी त्या चिमुकल्याच्या आईवडील आणि मामाला बेदम मारहाण केली. सुभेदारगंज मेलमध्ये ही गोंधळ निर्माण करणारी घटना घडली. या प्रकरणी लोहमार्ग पोलिसांनी तिघांना अटक केली आहे.
उत्तर प्रदेशातील सुलतानपूर जिल्ह्यात राहणारे अन्सार अहमद चांद अली (वय २०) त्याची बहिण, जावयांसह सुभेदारगंज स्पेशल एक्सप्रेसच्या जनरल कोचमध्ये बसून हैदराबादकडे निघाले होते. अन्सारची बहिण तिच्या चिमुकल्या मुलासह वरच्या बर्थवर बसून होती. शुक्रवारी दुपारी ही गाडी मध्य प्रदेशातील बैतूल-आमला स्थानकाजवळ आली असताना अन्सारच्या भाच्याने सू-सू केली. त्यामुळे खाली बसलेल्या आरोपी राकेश निशाद ललपुराम (वय २५) याचे कपडे ओले झाले. परिणामी चिडलेल्या राकेश आणि त्याच्या साथीदाराने अन्सार तसेच त्याच्या परिवारातील सदस्यांना शिवीगाळ केली. एवढेच नव्हे तर आता पुढे जे रेल्वे स्टेशन येईल, त्या स्टेशनवर उतरून दुसऱ्या कोचमध्ये बसण्याचे फर्माण सोडले. अन्सार आणि त्याच्या नातेवाईकांनी नकार दिल्यामुळे राकेशने दुसऱ्या कोचमध्ये बसलेल्या आपल्या दोन साथीदारांना फोन करून त्या कोचमध्ये बोलवून घेतले. त्यानंतर त्या तिघांनी अन्सारला बेदम मारहाण केली. त्याची बहिण आणि जावई समजावण्यााठी पुढे आले असता त्यांनाही अश्लिल शिवीगाळ करून मारहाण केली. एका आरोपीने पॅन्टचा बेल्ट काढून अन्सारला जोरदार मारहाण केली. बेल्टचे बक्कल डोक्याला लागल्याने अन्सार रक्तबंबाळ झाला. त्याच्या बहिणीच्या हातालाही दुखापत झाली. या घटनेमुळे ट्रेनमध्ये एकच गोंधळ निर्माण झाला. दरम्यान, अन्सारच्या जावयाने रेल्वे हेल्पलाईनवर फोन करून तक्रार नोंदवली. त्यामुळे रेल्वे सुरक्षा दल आणि रेल्वे पोलिसांच्या पथकाने ही गाडी नागपूर स्थानकावर येताच जनरल कोच गाठून जखमींना खाली उतरवून घेतले. अन्सारी आणि त्याच्या बहिणीवर उपचार करून त्यांची तक्रार लिहून घेतल्यानंतर आरोपी राकेश ललपुराम, कृष्णकांत गंधालाल (वय २३) आणि रंगबहादूर सूरमई (वय २६, रा. तिघेही सुलमई धखारा, प्रयागराज) या तिघांना पोलिस निरीक्षक पंजाबराव डोये यांनी अटक केली.
प्रकरण आमला पोलिसांकडे
या घटनेची सुरूवात आमला रेल्वे पोलिसांच्या हद्दीत झाल्याने नागपूर रेल्वे पोलिसांनी झिरो क्राईमी करून शनिवारी प्रकरण तसेच आरोपींना आमला पोलिसांच्या हवाली केले. पुढील तपास आमला पोलीस करीत असल्याचे स्थानिक पोलिसांनी सांगितले.