पित्याचा खून दडपणार्‍या पुत्रास नाकारला जामीन

नागपूर : तब्बल साडेतीन वर्षांपर्यंत जन्मदात्याचा खून दडपणार्‍या एका पुत्राचा अतिरिक्त सत्र न्यायाधीश एस. जी. मेहरे यांच्या न्यायालयाने जामीन अर्ज फेटाळून लावला. तसेच याच प्रकरणी सुनेसह तिघांनी दाखल केलेला अटकपूर्व जामीन अर्जही न्यायालयाने फेटाळला. पंकज दामोदरराव रघटाटे (३५) रा. ओमनगर, असे आरोपी पुत्राचे नाव आहे. संजय आनंदराव रघटाटे (४५) रा. धंतोली, दीप्ती पंकज रघटाटे (३२) आणि अनिल महादेवराव इखार (४७) रा. वर्धमाननगर, अशी आरोपींची नावे आहेत., ३० डिसेंबर २०११ रोजी शुक्रवारी तलावात ओमनगर येथील दामोदर सदाशिव रघटाटे (५८) यांचा मृतदेह तरंगताना आढळून आला होता. त्यांचा गळा दाबल्याने मृत्यू झाल्याचा प्राथमिक वैद्यकीय अहवाल त्यावेळी गणेशपेठ पोलिसांना प्राप्त झाला होता. त्यानंतर साडेतीन वर्षानंतर नुकताच अज्ञात आरोपीविरुद्ध खुनाचा गुन्हा दाखल करण्यात आला.

पोलिसांच्या तपासात असे निष्पन्न झाले होते की, २८ डिसेंबर २०११ रोजी मृत दामोदर हे आपला मुलगा पंकज, पुतण्या संजय, पंकजचा मित्र संजय भोकरे आणि जावई अनिल इखार कामठी मार्गावरील रनाळा येथील महाकाली मंदिराजवळ मद्य आणि मटण पार्टीसाठी एमएच -३३-एफ-१ क्रमांकाच्या टाटा सफारीने गेले होते. हे वाहन संजय भोकरे याच्या मालकीचे होते. या ठिकाणी मृत दामोदर यांच्या फ्रेम कारखान्यातील नोकर सुरेश पौनीकर, मित्र यादवराव पराते, रमेश निपाणे, चुडामण कुंभारे, महादेव टाकळीकर आणि पुष्पराज नंदनवार उपस्थित होते. पार्टी संपल्यानंतर सायंकाळी ७.३० वाजता सारेच आपापल्या घराकडे निघाले होते. परंतु दामोदर, संजय रघटाटे आणि संजय भोकरे हे छोटा ताजबाग येथे दर्शनासाठी गेले होते. रात्री ९ वाजताच्या सुमारास दामोदर यांना त्यांच्या घरी सोडून देण्यात आले होते.

दुसर्‍या दिवशी सकाळी ७ वाजता मृताचा पुतण्या संजय याने गांधीसागर तलाव गणेश घाट येथे मृताची स्कूटर आणि चपला दिसून आल्याचे कळवले होते. (प्रतिनिधी) पोलिसांनी जगदीश खरे याच्या मदतीने मृतदेहाचा शोध घेतला होता. परंतु तो आढळला नव्हता. दुसर्‍या दिवशी मृतदेह तलावात तरंगताना आढळला होता. शवविच्छेदन अहवालावरून दामोदर यांना झोपेतच त्यांचा गळा दाबून खून करण्यात आला. त्यानंतर मुलगा पंकज, सून दीप्ती आणि इतरांनी मृतदेह तलावात फेकून स्कूटर आणि चपला तलावाच्या काठावर ठेवून आत्महत्येचा देखावा निर्माण केला असावा, अशा दाट संशयावरून खून व पुरावा नष्ट करण्याचा गुन्हा दाखला करून पंकजला पोलिसांनी अटक केली होती. या प्रकरणाचा तपास गणेशपेठचे पोलीस निरीक्षक पी. वाय. मेश्राम करीत आहेत. न्यायालयात सरकारच्या वतीने अतिरिक्त सरकारी वकील राजेंद्र मेढे तर आरोपींच्या वतीने अ‍ॅड. सी. एच. शर्मा यांनी काम पाहिले.