दुर्गापूर कोळसा खाणीच्या गोदामाला आग

दुर्गापूर खुल्या कोळसा खाण परिसरात असलेल्या क्षेत्रीय भंडाराला रविवारी दुपारी १ वाजताच्या सुमारास आग लागली. या आगीमध्ये जवळपास ५० लाख रुपयांचे नुकसान झाल्याची माहिती मिळाली आहे.

 मोठा अनर्थ टळला : ५० लाख रुपयांचे साहित्य खाक

चंद्रपूर : दुर्गापूर खुल्या कोळसा खाण परिसरात असलेल्या क्षेत्रीय भंडाराला रविवारी दुपारी १ वाजताच्या सुमारास आग लागली. या आगीमध्ये जवळपास ५० लाख रुपयांचे नुकसान झाल्याची माहिती मिळाली आहे. आग वेळीच आटोक्यात आल्याने मोठा अनर्थ टळला. दुर्गापूर कोळसा खाण परिसरात चंद्रपूर वेकोलिचे क्षेत्रीय भंडार आहे. या भंडारातून चंद्रपूर क्षेत्रात असलेल्या सर्व कोळसा खाणींना लागणारे साहित्य पुरविले जाते. जुन्या साहित्याचा साठाही याच ठिकाणी केला जातो. कोळसा खाणीत कोळसा व माती उत्खननाकरिता मोठमोठ्या वाहनांचा उपयोग केला जातो. या वाहनांचे जुने टायरसुद्धा येथे साठविण्यात येतात. त्यामुळे परिसरात मोठ्या प्रमाणात भंगार साहित्य आहे. रविवारी दुपारी १ वाजताच्या सुमारास येथे साठवून ठेवलेल्या टायरला अचानक आग लागली. काही वेळातच आगीने उग्ररुप धारण केल्याने परिसरात सर्व साहित्य आगीने क्षणात आपल्या कवेत घेतले. याच परिसरात मोठ्या संख्येने आॅईलने भरलेले ड्रम तसेच काही अंतरावर वेकोलिचे क्षेत्रीय भंडारचे कार्यालयही आहे. या आगीमध्ये टायर, भंगारातील चार चाकी वाहने जळून खाक झाली. आगीची माहिती अधिकार्‍यांना देण्यात आली. त्याचवेळी अग्निशमन दलाला पाचारण करण्यात आले. चंद्रपूर वीज केंद्रातील दोन, महानगरपालिकेचे दोन अशा चार अग्निशमन पथकाने आगीवर नियंत्रण मिळविले. या आगीमध्ये जवळपास ५० लाख रुपयांचे नुकसान झाल्याचा प्राथमिक अंदाज व्यक्त केला जात आहे. उल्लेखनिय असे की, मागील वर्षी सुद्धा याच परिसरात आग लागली होती. त्यामुळे यात काही गौंडबंगाल असल्याची चर्चा सध्या परिसरात आहे. (नगर प्रतिनिधी)