नरेश डोंगरे, लोकमत न्यूज नेटवर्क, नागपूर : घर, समाज अन् वयाची तमा न बाळगता त्यांनी गाव सोडले. छत्तीसगडची ही सुसाट 'लव्ह एक्सप्रेस' राज्याची सिमा ओलांडून महाराष्ट्रात दाखल झाली. मात्र, नागपूर स्थानकावर तिला जीआरपीने 'रेड सिग्नल' दाखविला. त्यामुळे या प्रेमीयुगुलाची ताटातुट झाली. बुधवारी रात्री ही घटना उजेडात आली.
दुर्ग जिल्ह्यातील (छत्तीसगड) एका सधन घरातील १५ वर्षीय सपनाचे (नाव काल्पनिक) नात्यातील साजनसोबत (वय २४, नाव काल्पनिक) प्रेमसंबंध होते. साजन वयस्क असला तरी सपना मात्र अल्पवयीन असल्याने त्यांच्या लग्नात कायदेशिर अडथळा निर्माण झाला होता. कुटुंबीयच काय कायदाही आपल्या प्रेमसंबंधाला, लग्नाला परवानगी देणार नाही, याची त्यांना कल्पना होती. तरीदेखिल त्यांनी 'जिना मरना तेरे संग'च्या आणाभाका घेतल्या होत्या. त्यामुळे त्यांनी 'चल कही दूर निकल जाये'चा निर्णय घेतला.
बुधवारी पळून जाण्याच्या तयारीने साजन आणि सजनी ट्रेन नंबर १८२३७ छत्तीसगड एक्सप्रेसमध्ये बसले. ते गायब झाल्याचे कळाल्याने कुटुंबीयांनी पोलिसांकडे धाव घेतली. तक्रार मिळाल्यानंतर पोलिसांनी रेल्वे स्थानकावरचे सीसीटीव्ही चेक केले असता हे दोघे छत्तीसगड एक्सप्रेसमध्ये बसून नागपूरकडे गेल्याचे दिसले. तोपर्यंत गाडी छत्तीसगडची सिमा ओलांडून नागपूरजवळ पोहचली होती.
परिणामी दुर्ग पोलिसांनी येथील रेल्वे पोलिसांना मेसेज दिला. त्यानुसार, रात्री ९.४५ च्या सुमारास नागपूर स्थानकावर तीन क्रमांकाच्या फलाटावर येताच जीआरपीचे सतिश बुराडे, जिचकार, रिता राऊत आणि सहकाऱ्यांनी गाडीची कसून तपासणी केली. एका कोचमध्ये हे प्रेमीयुगुल आढळल्यामुळे त्यांना लगेच खाली उतरवण्यात आले. या घडामोडीची माहिती दुर्ग पोलिसांच्या माध्यमातून मुलीच्या कुटुंबियांनाही कळविण्यात आली. त्यानुसार, ते नागपूरकडे येण्यासाठी निघाले.
घर बसवायचे, संसार थाटायचा...
दूर कुठे तरी जायचे आणि तेथे आपल्या स्वप्नाचे घर बसवायचे, संसार थाटायचा, अशी या दोघांची कल्पना होती. मात्र घर, गावच नव्हे तर प्रांतही सोडून पळून जात असलेल्या या प्रेमीयुगुलाला पोलिसांनी ताब्यात घेतल्यामुळे त्यांचा स्वप्नभंग झाला आहे.
पालकांचा समंजसपणा, दोघांची घरवापसी
रात्रीची वेळ आणि मुलगी अल्पवयीन असल्यामुळे पोलिसांनी कायदेशिर औपचारिकता पार पाडून मुलीला काटोल मार्गावरील शासकीय वस्तीगृहात पाठविले. तर, प्रियकराला मात्र ताब्यात ठेवले. आज दोघांचेही पालक नागपुरात पोहचले. मुला-मुलींचे भवितव्य लक्षात घेता त्यांनी कोणतीही कारवाई करू नका, अशी विनवणी केली. ती मान्य करून रेल्वे पोलिसांनी त्यांची घरवापसी केली.