डॉक्टरांचे असहकार आंदोलन सोमवारपासून

महाराष्टÑ राज्य राजपत्रित वैद्यकीय अधिकारी गट ‘अ’ संघटनेच्या (मॅग्मो) मागण्यांना घेऊन शासनाने आश्वासन दिले होते. यामुळे संघटनेने २०११ पासून आंदोलनाला स्थगिती दिली होती,

सामूहिक राजीनामे देणार : मॅग्मोचा इशारा

नागपूर : महाराष्टÑ राज्य राजपत्रित वैद्यकीय अधिकारी गट ‘अ’ संघटनेच्या (मॅग्मो) मागण्यांना घेऊन शासनाने आश्वासन दिले होते. यामुळे संघटनेने २०११ पासून आंदोलनाला स्थगिती दिली होती, परंतु शासनाचे मागण्यांकडे दुर्लक्ष होत असल्याचे लक्षात येताच पुन्हा वैद्यकीय अधिकार्‍यांनी सोमवार २६ मे पासून असहकार आंदोलन पुकारले आहे. राज्यभरात सार्वजनिक आरोग्य विभागात वैद्यकीय अधिकारी, वरिष्ठ आरोग्य अधिकार्‍यांची संख्या १२ हजार आहे तर विदर्भात साडेतीन हजार वैद्यकीय अधिकारी, वरिष्ठ वैद्यकीय अधिकारी आहेत. त्यांच्याकडून येत्या २६ ते ३१ मे दरम्यान असहकार आंदोलन करण्यात येईल. अधिक माहिती देताना महाराष्टÑ राज्य राजपत्रित वैद्यकीय अधिकारी गट ‘अ’ संघटनेचे सरचिटणीस डॉ. प्रमोद रक्षमवार यांनी सांगितले. या दरम्यान सरकारला दर दिवसाला पाठविण्यात येणारा आरोग्याचा ताळेबंद माहिती (मेडिकल इन्फर्मेशन सिस्टिम) व बैठकीवर बहिष्कार टाकण्यात येईल. १ जून ते ६ जूनपर्यंत बाह्यरुग्ण विभाग बंद करून फक्त आकस्मिक विभागात सेवा देण्यात येईल. त्यानंतरही शासनाने मागण्या मान्य न केल्यास ७ जूनपासून आकस्मिक विभाग, शवविच्छेदन आणि एमएलसी केसेस पाहणे बंद करू. दुसर्‍या टप्प्यात सामूहिक रजा आणि शेवटच्या टप्प्यात सामूहिक राजीनामे देऊ. राज्यातील ८० टक्के जनता गावखेड्यात राहते. त्यांच्या आरोग्याची काळजी घेण्यासाठी सार्वजनिक आरोग्य विभागातील सहाव्या वेतन आयोगामध्ये वेतनश्रेणीत वैद्यकीय अधिकार्‍यांवर अन्याय झाला आहे. राज्यातील वैद्यकीय अधिकारी आणि वरिष्ठ वैद्यकीय आरोग्य अधिकार्‍यांना दिलेल्या वेतनश्रेणीत प्रचंड तफावत आहे. केंद्र सरकार तसेच वैद्यकीय शिक्षण विभागाप्रमाणे सार्वजनिक आरोग्य विभागातील वैद्यकीय अधिकार्‍यांना वेतनश्रेणी लागू करावी या मागणीसहित अनेक मागण्या पूर्ण करण्याचे आश्वासन खुद्द मुख्यमंत्री पृथ्वीराज चव्हाण यांनी दिले, परंतु आश्वासन पाळले नाही. यामुळे सर्व अधिकारी रस्त्यावर येऊन सरकारच्या विरोधात हे असहकार आंदोलन पुकारणार आहेत. (प्रतिनिधी)