व्हीएनआयटीच्या विद्यार्थ्यांना ११३४ पदव्यांचे हाेणार वितरण

नागपूर : विश्वेश्वरैया राष्ट्रीय प्रौद्योगिकी संस्थान (व्हीएनआईटी)चा १९ वा दीक्षांत समाराेह येत्या १५ सप्टेंबर राेजी आयाेजित करण्यात आला आहे. केंद्रीय मंत्री नितीन गडकरी तसेच डीएसआयआरचे सचिव व वैज्ञानिक व औद्याेगिक संशाेधन परिषदेचे महासंचालक डाॅ. शेखर मांडे यांच्या उपस्थितीत संस्थेच्या सभागृहात हा समाराेह हाेणार असून पीएचडीधारकांसह व्हीएनआयटीच्या विद्यार्थ्यांना ११३४ पदव्यांचे वितरण हाेणार आहे.

व्हीएनआयटीचे संचालक डाॅ. प्रमाेद पडाेळे यांनी पत्रपरिषदेत याबाबत माहिती दिली. दुपारी १२.३० वाजता आभासी माेडवर समाराेह सुरू हाेईल. पदवी वितरणामध्ये ४९ विद्यार्थ्यांना डॉक्टर ऑफ फिलॉसॉफी, ३३३ विद्यार्थ्यांना मास्टर ऑफ टेक्नॉलॉजी, ६० विद्यार्थ्यांना डॉक्टर ऑफ सायन्स, विविध शाखेतील ६३४ पदवीधारकांना बॅचलर ऑफ टेक्नालॉजी आणि ५९ विद्यार्थ्यांना बॅचलर ऑफ आर्किटेक्चरची पदवी देऊन सन्मानित करण्यात येईल. याशिवाय संशाेधनाच्या क्षेत्रात उल्लेखनीय कार्य करणाऱ्या विद्यार्थ्यांना ४६ पदके आणि शैक्षणिक गुणवत्ता पुरस्काराने सन्मानित करण्यात येईल.

डाॅ. पडाेळे यांनी सांगितले, काेराेना संक्रमण काळात संस्थेच्या शिक्षक व विद्यार्थ्यांनी अनेक उल्लेखनीय कार्य केले आहे. तंत्रज्ञान विकसित करून एम्स व शासकीय वैद्यकीय महाविद्यालयाला समर्पित केले. यासह सामाजिक जबाबदारी स्वीकारत संस्थेच्या माजी विद्यार्थ्यांच्या संघटनांनी नागरिकांना ऑक्सिजन व इतर वैद्यकीय उपकरणे वितरित केली. मागील वर्षी व्हीएनआयटीला ३४ पेटंट प्राप्त झाले आहेत.

अत्याधुनिक रुग्णालय सुरू करणार

संस्थेच्या परिसरात असलेल्या जुन्या रुग्णालयाचा कायाकल्प करून अत्याधुनिक रुग्णालयात रुपांतरित करण्यात येणार असल्याचे डाॅ. पडाेळे यांनी सांगितले. रुग्णालयात सर्व प्रकारच्या सुविधा तयार करण्यात आल्या असून डाॅक्टरांची नियुक्ती करण्यात आली आहे. संस्थेचे शिक्षक, शिक्षकेतर कर्मचारी व विद्यार्थ्यांना या रुग्णालयाची सुविधा मिळणार आहे.