नुकसान भरपाईपासून शेतकरी वंचित

अवकाळी पाऊस व वादळाच्या तडाख्याने हवालदिल झालेल्या शेतकऱ्यांना शासनाने मदतीचा हात दिला. १५ एप्रिल २0१४ पर्यंंत नुकसानभरपाई देण्याचे शासनाने परिपत्रक काढले.

बाबा टेकाडे - सावनेर

अवकाळी पाऊस व वादळाच्या तडाख्याने हवालदिल झालेल्या शेतकर्‍यांना शासनाने मदतीचा हात दिला. १५ एप्रिल २0१४ पर्यंंत नुकसानभरपाई देण्याचे शासनाने परिपत्रक काढले. याबाबत अधिकार्‍यांना बजविण्यात आले. मात्र, प्रशासन आणि बँकेच्या हलगर्जीपणामुळे अद्यापही शेकडो शेतकर्‍यांना नुकसानभरपाईचा मोबदला मिळाला नाही. त्यामुळे शेतकर्‍यांत संताप व्यक्त होत आहे.

सावनेर तालुक्यात अवकाळी व वादळासह गारपीट झाली. त्यामुळे शेतकर्‍यांच्या संत्रा, मोसंबी, कापूस, सोयाबीन, तूर, भाजीपाला, गहू, हरभरा आदी पिकांचे अतोनात नुकसान झाले. लाखो रुपयांचे हातचे पीक गेल्याने शेतकर्‍यांचे कंबरडे मोडले. कर्जबाजारी शेतकरी अधिकच आर्थिक अडचणीत सापडला.

अशा परिस्थितीत आदर्श आचारसंहिता लागू असतानाही शासनाने निवडणूक आयोगाकडून विशेष परवानगी घेऊन नुकसानभरपाई देण्याचे जाहीर केले. त्यामुळे शेतकर्‍यांना दिलासा मिळाला. शेतकर्‍यांच्या खात्यात १५ एप्रिलपावेतो नुकसानभरपाई जमा करण्यात यावी, असे स्पष्ट आदेश देण्यात आले. अन्यथा रक्कम परत करावी, असाही परिपत्रकात उल्लेख आहे. परंतु शासनाच्या आदेशाला केराची टोपली दाखवली. त्यामुळे शेतकरी तहसील कार्यालय व बँकेच्या चकरा मारत आहेत.

विशेष म्हणजे ४२0 लाभार्थ्यांंचा २७ लाख रुपयांचा धनादेश बँकेच्या हलगर्जीपणामुळे गहाळ झाला. याबाबत एचडीएफसी बँकेने काहीच गंभीरतेने दखल घेतली नाही. तद्वतच तहसील कार्यालयासही कळविले नाही. शेतकरी बँकेचे हेलपाटे मारत होते. अद्याप नुकसानभरपाईची रक्कम खात्यात जमा का झाली नाही, अशी ओरडही झाली. त्यामुळे खळबळ माजली. तहसील कार्यालयातून एचडीएफसी बँकेत वारंवार फोनने संपर्क करण्याचा प्रयत्न झाला. परंतु, कुणीही प्रतिसाद दिला नाही. त्यामुळे तहसील कार्यालयातील संबंधित कर्मचारी नागपूर येथील बँकेत गेले. त्यावेळी नुकसानभरपाईचा २७ लाख रुपयांचा धनादेश गहाळ झाल्याची बाब निदर्शनात आली.

त्यानंतर १५ एप्रिल २0१४ ला पुन्हा दुसरा धनादेश तयार करून बँकेला दिला. तरीदेखील शेतकर्‍यांना रक्कम मिळाली नाही. परिणामी शेतकर्‍यांचे बँक व तहसील कार्यालयातील हेलपाटे सुरूच आहेत.