जेवणाची थाळी, साडेचार लाखांत

लोकमत न्यूज नेटवर्क

नागपूर : स्वस्तात काही मिळतेय या अपेक्षेने अनेकजण फेक जाहिरातींना क्लिक करतात आणि तिथेच फसतात. असाच काहीसा प्रकार नागपुरातील महिलेसोबत घडला. फेसबुकवर जेवणाची थाळी पाहिली आणि कुठलाही विचार न करता ऑर्डर दिली. काही वेळातच सायबर गुन्हेगाराने या महिलेचे तब्बल साडेचार लाख रुपये लंपास केले. ही धक्कादायक घटना गिट्टीखदान पोलीस ठाण्याच्या हद्दीत १७ मार्च दुपारी १२ वाजता घडली. बुधवारी, १७ मार्च रोजी गिट्टीखदान पोलिसांनी याप्रकरणी गुन्हा दाखल केला.

दाभा येथील अर्चना मकरंद पंडित (वय ४९) यांनी फेसबुकवर जेवणाच्या थाळीची जाहिरात बघितली. तेथे नमूद मोबाईलवर पंडित यांनी संपर्क केला असता, आरोपीने त्यांना टेक लिंक पाठवली आणि ॲप डाऊनलोड करण्यास सांगून दहा रुपये पेड करा, असेही सांगितले. पंडित यांनी तसेच केले. त्यानंतर त्यांच्या बँक खात्यातून ५० हजार रुपये काढून घेतल्याचा त्यांना मेसेज आला. त्यांनी यासंबंधाने पुन्हा आरोपीशी संपर्क साधला असता आरोपीने त्यांना रक्कम परत करतो, अशी बतावणी करून त्यांना ओटीपी विचारला. त्यानंतर वेगवेगळ्या वेळेला त्यांच्या खात्यातून एकूण चार लाख ४४ हजार रुपये काढून घेतले. सायबर गुन्हेगाराने रक्कम लांबविल्याचे लक्षात आल्यानंतर पंडित यांनी गिट्टीखदान पोलीस ठाण्यात धाव घेतली. प्रकरण चौकशीसाठी सायबर शाखेत गेले. त्यानंतर या प्रकरणी बुधवारी पंडित यांच्या तक्रारीवरून गिट्टीखदान पोलिसांनी आयटी ॲक्ट तसेच फसवणुकीच्या कलम ४२० अन्वये गुन्हा दाखल केला. आरोपींचा शोध घेतला जात आहे.

---