इंग्रजीच्या भीतीला शिकवणीचे औषध

एका काळ होता की इंग्रजी भाषा म्हणजे अभ्यासातील सर्वात मोठा अडसर समजला जायची. परंतु गेल्या काही काळापासून इंग्रजीबद्दलची मुलांमधली भीती कमी व्हायला लागली आहे. यंदाच्या शालांत परीक्षेत

लहानपणापासूनच शिकवणी : विद्यार्थ्यांच्या चांगल्या करिअरसाठी पालकांचा अट्टहास
नागपूर : एका काळ होता की इंग्रजी भाषा म्हणजे अभ्यासातील सर्वात मोठा अडसर समजला जायची. परंतु गेल्या काही काळापासून इंग्रजीबद्दलची मुलांमधली भीती कमी व्हायला लागली आहे. यंदाच्या शालांत परीक्षेत तर ९४ टक्क्यांहून जास्त विद्यार्थी इंग्रजीत उत्तीर्ण झाले. शाळेच्या पहिल्या वर्गापासून मुलांना इंग्रजीचे धडे मिळावेत, असा पालकांचा अट्टहास व त्यातूनच लावण्यात येणाऱ्या शिकवणी यामुळे इंग्रजीची स्थिती बदलत आहे. बदललेल्या स्थितीसाठी करिअरसाठी कुठल्याही क्षेत्रात पाऊल ठेवले, तरी इंग्रजी भाषेला महत्त्व दिले जाते. त्यातूनच खासगी शिकवण्यांनाही गर्दी वाढत असल्याचे ‘लोकमत’च्या सर्वेक्षणातून दिसून येते.
मुले इंग्रजी माध्यमात शिक्षण घेत असल्यानेच शिकवणी लावल्याचे अनेक पालकांनी म्हटले आहे. तसेच, ‘केजी’पासूनच मुलांना शिकवणीला पाठविले जात असल्याचेही सर्वेक्षणात आढळून आले.
आपल्या मुलांना अभ्यासाची सवय लागावी, किंबहुना आजच्या स्पर्धेच्या युगात टिकून राहावे, यासाठी त्याला जास्तीत-जास्त पूरक शिक्षण दिले जाते. मग या पूरक शिक्षणासाठी वेगवेगळे पर्याय अवलंबले जातात. योग्य शाळा लावणे, घरी वेळच्या-वेळी अभ्यास घेणे, त्याचबरोबर पाल्यास योग्य शिकवणी लावणे याचे प्रमाण वाढत आहे. परंतु, आश्चर्याची बाब म्हणजे केजीपासूनच मुलांना शिकवणीला पाठविले जाते.
मुले इंग्रजी माध्यमात शिकत असल्याने शिकवणी लावत असल्याचे अनेक पालकांचे म्हणणे आहे. सर्वेक्षणानुसार केजी ते इयत्ता चौथीपर्यंत शिकवणी लावण्याचे हे प्रमाण २९ टक्के आहे तर आठवी ते दहावीतील ३९ टक्के विद्यार्थी शिकवणीला जातात. इंग्रजी माध्यमामुळे शिकवणी लावली असल्याचे तब्बल ७२ टक्के पालकांनी सांगितले आहे.
बदलत्या अभ्यासक्रमामुळे मुलांना शिकवणी लावणे गरजचे झाले आहे. पुढच्या वर्गात जाण्याबरोबरच त्यांचा अभ्यासही वाढत जातो. आठवी व नववी हा दहावीचा पाया मानला जातो म्हणून शिकवणीची गरज पडते असे मत पालकांनी व्यक्त केले. (प्रतिनिधी)