कामठी रोडवरील मेट्रो स्टेशनला ‌‘कांशीराम’ यांच्या नावाची मागणी ()

नागपूर : कामठी रोडवरील कांशीराम टी-पॉईंट व कांशीराम मार्ग असलेल्या ठिकाणावरील मेट्रो स्टेशनला कांशीराम मेट्रो स्टेशन असे नाव देण्यात यावे, अशी मागणी बहुजन समाज पार्टीतर्फे करण्यात आली आहे. यासंदर्भात सोमवारी बसपा नेत्यांनी महामेट्रोचे महाव्यवस्थापक ब्रिजेश दीक्षित यांना भेटून निवेदन सादर केले.

महापालिकेतर्फे कामठी रोडवरील नारी रोडचे कांशीरामजी मार्ग असे नामकरण करण्यात आले आहे. २८ फेब्रुवारी २०१४ ला महापौरांच्या उपस्थितीत त्याचे उद्घाटनही करण्यात आले. परंतु महामेट्रोच्या नजरचुकीने या प्रस्तावित स्टेशनला नारी रोड स्टेशन असे जुने बॅनर लावण्यात आले, त्यामुळे बसपा नेत्यांनी त्यावर हरकत घेऊन हे निवेदन सादर केले आहे. यासोबतच कस्तूरचंद पार्क स्टेशनला संविधान चौक मेट्रो स्टेशन, रहाटे कॉलनी चौक स्टेशनला दीक्षाभूमी मेट्रो स्टेशन व विमानतळ परिसरातील तीन स्टेशनपैकी मुख्य स्टेशनला डॉ. बाबासाहेब आंबेडकर आंतरराष्ट्रीय विमानतळ मेट्रो स्टेशन असे नाव देण्याची मागणीही करण्यात आली आहे.

शिष्टमंडळात बसपाचे प्रदेश महासचिव प्रा. भाऊसाहेब गोंडाणे, प्रदेश सचिव उत्तम शेवडे, जिल्हा अध्यक्ष संदीप मेश्राम, माजी पक्षनेते गौतम पाटील यांचा समावेश होता. तर निवेदनावर नितीन शिंगाडे, बसपा पक्षनेता वैशाली नारनवरे, मनपाच्या आशीनगर झोन सभापती वीरंका भिवगडे, नगरसेविका वंदना चांदेकर, मंगला लांजेवार, ममता सहारे, नगरसेवक जितेंद्र घोडेस्वार, इब्राहिम मोहम्मद, नरेंद्र वालदे, संजय बुरेवार आदींच्या स्वाक्षऱ्या आहेत.

---------------------------------------