लोकमत न्यूज नेटवर्क नागपूर : मानकापूर येथील शासकीय मनोरुग्णालयाच्या परिसरात बांधण्यात आलेल्या जिल्हा रुग्णालयासाठी विविध आवश्यक पदांना मंजुरी मागणाऱ्या प्रस्तावावर येत्या ४ फेब्रुवारीपर्यंत निर्णय घ्या, असा आदेश मुंबई उच्च न्यायालयाच्यानागपूर खंडपीठाने बुधवारी आरोग्य विभागाच्या उच्चस्तरीय समितीला दिला.
हे रुग्णालय तातडीने कार्यान्वित व्हावे, यासाठी सामाजिक कार्यकर्ते सत्यव्रत दत्ता व धरमदास बागडे यांनी उच्च न्यायालयात जनहित याचिका दाखल केली आहे. त्यावर न्यायमूर्तीद्वय नितीन सांबरे व वृषाली जोशी यांच्यासमक्ष सुनावणी झाली. दरम्यान, आरोग्य विभागाच्या उपसंचालकांनी या रुग्णालयासाठी विविध आवश्यक पदांना मंजुरी मिळण्यासाठी मे-२०२३ मध्ये उच्चस्तरीय समितीला प्रस्ताव सादर केला गेला आहे, अशी माहिती दिली. तसेच, या प्रस्तावावर अद्याप निर्णय घेण्यात आला नाही, याकडे लक्ष वेधले. करिता, न्यायालयाने हा आदेश दिला व पुढच्या तारखेला आरोग्य विभागाच्या प्रधान सचिवांनी यासंदर्भात प्रतिज्ञापत्र दाखल करावे, असेही सांगितले.
१०० खाटांची क्षमता असलेल्या या रुग्णालयामध्ये ओपीडी, नेत्ररोग, ईसीजी, प्रयोगशाळा, फिजिओथेरपी, रक्तपेढी, एक्स-रे, स्त्रीरोग, प्रसूती, बालरोग, सोनोग्राफी, शस्त्रक्रिया, अतिदक्षता, दंतचिकित्सा आदी वैद्यकीय सुविधा राहणार आहेत. १७ जानेवारी २०१३ रोजी मंजूर हे रुग्णालय बांधण्यासाठी २ मे २०१८ रोजी एन. एस. कन्स्ट्रक्शन कंपनीला कार्यादेश दिला गेला होता. त्यानंतर हे काम १ मे २०२० पर्यंत पूर्ण होणे अपेक्षित होते. परंतु, प्रशासकीय अडचणी व कोरोनामुळे रुग्णालय बांधण्यास विलंब झाला. दरम्यान, न्यायालयाने वेळोवेळी दिलेल्या आवश्यक आदेशांमुळे रुग्णालयाच्या कामांना गती मिळाली.