बहिरेपणा नाही श्राप, नका देऊ त्यांना त्रास

नागपूर : श्रवणशक्ती व कानांचे आजार लवकर ओळखणे ही प्रभावी व्यवस्थापनाची गुरुकिल्ली आहे. वैद्यकीय उपचारांमुळे अर्धे नुकसान टाळता येते. लसीकरण, गर्भधारणेदरम्यान योग्य काळजी, मोठा आवाज टाळल्यास बहिरेपणाला काही प्रमाणात दूर ठेवणे शक्य असल्याची जनजागृती रविवारी विदर्भ ‘एओआय’च्यावतीने आयोजित करण्यात आलेल्या पदयात्रेतून करण्यात आली. यावेळी ‘बहिरेपणा नाही श्राप, नका देऊ त्यांना त्रास’ हे घोषवाक्य लक्ष वेधणारे ठरले.

आंतरराष्ट्रीय बहिरेपणा जागरूकता आठवड्यानिमित्ताने विदर्भ कान, नाक व घसा तज्ज्ञ आणि वाचा थेरपिस्ट संघटनेच्यावतीने (एओआय) लोकमत भवन चौक ते व्हेरायटी चौक दरम्यान पदयात्रा काढण्यात आली. यात विदर्भातून जवळपास ७५ ईएनटी विशेषज्ञांसह ईएनटी पदव्युत्तरचे विद्यार्थी, ऑडिओलॉजिस्ट आणि स्पीच लँग्वेज थेरपिस्ट तज्ज्ञ सहभागी झाले होते. केंद्रीय ‘एओआय’चे सदस्य डॉ. नंदू कोलवाडकर व डॉ. समीर चौधरी यांनी यासाठी पुढाकार घेतला. या पदयात्रेचे नियोजन व अंमलबजावणी विदर्भ ‘एओआय’चे अध्यक्ष डॉ. प्रशांत निखाडे व सचिव डॉ. समीर ठाकरे यांनी केले. यावेळी शहरातील पाचही वैद्यकीय महाविद्यालये सहभागी झाली होती. विशेषत: मेडिकलचे ईएनटी विभागाचे प्रमुख डॉ. देवेंद्र माहोरे, मेयोच्या ईएनटी विभागाचे प्रमुख डॉ. जीवन वेदी, डॉ. विवेक हरकरे, डॉ. बी. श्रीकृष्ण, डॉ. सुरेंद्र गवारले, डॉ. बी. के. शर्मा व डॉ. राजेंद्र देशमुख आदींचा समावेश होता. या पदयात्रेत सहभागी विद्यार्थी व तज्ज्ञांनी ईएनटीबाबत आजारांचे व उपचारांचे फलक हाती घेत जनजागृती केली.

- बहिरेपणाचा जीवनाच्या अनेक पैलूंवर परिणाम - डॉ. निखाडे

डॉ. प्रशांत निखाडे म्हणाले, बहिरेपणामुळे संवाद, भाषण, आकलन, शिक्षण आणि रोजगार यासारख्या जीवनातील अनेक पैलूंवर परिणाम होतो. श्रवण कमी झालेल्या मुलांना अनेकदा शालेय शिक्षण मिळत नाही. श्रवणशक्ती कमी असलेल्या प्रौढांमध्येही बेरोजगारीचे प्रमाण खूप जास्त असते. ज्यांची श्रवणशक्ती कमी आहे, अशा लोकांमध्ये सामान्यांच्या तुलनेत कमी ग्रेडच्या नोकऱ्या मिळतात. म्हणूनच श्रवणशक्ती व संबंधित रोगाचे वेळीच निदान व उपचार होणे आवश्यक असून, त्याविषयी जनजागृती करणे गरजेचे आहे.