नगरसेवक रोडे यांची भाजपमधून हकालपट्टी

मौदा : मौदा नगरपंचायतीच्या उपाध्यक्षपदाच्या निवडणुकीत बंडखोरी करीत भाजपचे उपाध्यक्षपदाचे उमेदवार मुन्ना चलसानी यांच्याविरुद्ध दंड थोपटणारे नगरसेवक सुनील रोडे यांची पक्षशिस्तीचे उल्लंघन केल्याप्रकरणी भाजपमधून हकालपट्टी करण्यात आली आहे.

रोडे यांनी काँग्रेसच्या ५ नगरसेवकांचे समर्थन घेत उपाध्यक्षपदाच्या निवडणुकीत भाजपचे मुन्ना चलसानी यांच्यापुढे आव्हान उभे केले होते. ऐनवेळी शिवसेनेच्या दोन नगरसेवकांनी उपाध्यक्षपदाच्या निवडणुकीत मतदान न केल्याने रोडे यांचे राजकीय गणित बिघडले अन् भाजपचे मुन्ना चलसानी विजयी झाले. त्यामुळे निवडणुकीनंतर रोडे यांच्यावर कारवाई होणे अपेक्षित होते. सोमवारी भाजपचे प्रदेश महामंत्री चंद्रशेखर बावनकुळे मौैदा दौऱ्यावर होते. त्यांना पक्ष कार्यकर्त्यांनी उपाध्यक्षपदाच्या निवडणुकीत झालेल्या गोंधळाची माहिती दिली. यानंतर भाजपचे मौदा शहराध्यक्ष प्रकाश येळणे यांनी रोडे यांची पक्षातून हकालपट्टी करण्यात आल्याचे जाहीर केले. त्यामुळे भविष्यात रोडे काँग्रेसचा हात पुन्हा धरतात का, याकडे त्यांच्या समर्थकांचे लक्ष लागले आहे.