CoronaVirus in Nagpur : १० खासगी कोविड हॉस्पिटलमधील खाटा रिकाम्या
By लोकमत न्यूज नेटवर्क | Published: October 22, 2020 10:33 PM2020-10-22T22:33:10+5:302020-10-22T22:34:13+5:30
Corona Virus, Covid hospital beds empty, Nagpur News सण उत्सवाच्या तोंडावर कोरोनाबाधितांची संख्या व मृत्यूचे प्रमाण कमी होऊ लागले आहे. यामुळे आरोग्य यंत्रणेसोबतच सामान्यांना काहीसा दिलासा मिळाला आहे. विशेष म्हणजे, ऑगस्ट व सप्टेंबर महिन्यात खासगी कोविड हॉस्पिटलचा खाटा फुल्ल होत्या. मात्र, आता चित्र पालटले आहे.
CoronaVirus in Nagpur : १० खासगी कोविड हॉस्पिटलमधील खाटा रिकाम्या
लोकमत न्यूज नेटवर्क
नागपूर : सण उत्सवाच्या तोंडावर कोरोनाबाधितांची संख्या व मृत्यूचे प्रमाण कमी होऊ लागले आहे. यामुळे आरोग्य यंत्रणेसोबतच सामान्यांना काहीसा दिलासा मिळाला आहे. विशेष म्हणजे, ऑगस्ट व सप्टेंबर महिन्यात खासगी कोविड हॉस्पिटलचा खाटा फुल्ल होत्या. मात्र, आता चित्र पालटले आहे. गुरुवारी दहा खासगी हॉस्पिटलमध्ये एकही रुग्ण नव्हता. तर, ३५ हॉस्पिटलमध्ये १०च्यावर रुग्ण नव्हते. गुरुवारी जिल्ह्यात १४ मृत्यू तर ६०२ नवे रुग्ण आढळून आले. रुग्णांची एकूण संख्या ९२,५९० झाली असून मृतांची संख्या ३,०१४ वर पोहचली.
नागपूर जिल्ह्यात सप्टेंबर महिन्यात एका दिवसात ६४ रुग्णांच्या मृत्यूने उच्चांक गाठला होता. परंतु त्यानंतर मृतांची संख्या कमी होऊ लागली. मागील आठ दिवसांत दैनंदिन मृत्यूची संख्या २५च्या आत होती. मेयो, मेडिकल व एम्ससह खासगी रुग्णालयांसाठी ही समाधानकारक बाब आहे. आज ६,७०६ संशयित रुग्णांच्या चाचण्या करण्यात झाल्या. यात ३,९९९ आरटीपीसीआर तर २,७९७ रॅपिड ॲन्टिजेन चाचण्या होत्या. रॅपिडमध्ये २५८ तर आरटीपीसीआरमध्ये ३४४ रुग्ण पॉझिटिव्ह आले. मेयोच्या प्रयोगशाळेत ७५, मेडिकलच्या प्रयोगशाळेत ५०, एम्सच्या प्रयोगशाळेत ४०, माफसूच्या प्रयोगशाळेत ३१, नीरीच्या प्रयोगशाळेत १५ तर खासगी लॅबमधून १३३ रुग्ण बाधित असल्याचे निदान झाले. मृत्यूदर २.८७ टक्के तर रुग्ण बरे होण्याचे प्रमाण ९०.३३ टक्के झाले आहे.
शहरात सहा तर ग्रामीणमध्ये चार बळी
शहरात आज सहा, ग्रामीणमध्ये चार तर जिल्ह्याबाहेरील रुग्णांचे तीन बळी गेले. आतापर्यंतची ही सर्वात कमी संख्या आहे. बाधितांमध्ये शहरातील ४६०, ग्रामीणमधील १३९ तर जिल्ह्याबाहेरील तीन रुग्णांचा समावेश आहे. ७३७ रुग्ण कोरोनामुक्त झाले. यातील शहरातील ५०२ तर ग्रामीण भागातील २३५ आहेत. आतापर्यंत एकूण ८३,६३३ रुग्ण बरे झाले. मेयो, मेडिकल, एम्ससह इतर खासगी हॉस्पिटलमध्ये १,९९८ रुग्ण उपचाराखाली आहेत. ३,९४५ रुग्ण होम आयसोलेशनमध्ये आहे. गेल्या २० दिवसांपासून हे दोन्ही आकडे कमी कमी होत आहेत.
कोरोनाची आजची स्थिती
दैनिक संशयित : ६७०६
बाधित रुग्ण : ९२५९०
बरे झालेले : ८३६३३
उपचार घेत असलेले रुग्ण : ५९४३
मृत्यू : ३०१४
