- लक्ष्मीनगर-नेहरूनगरची स्थिती बिकट
राजीव सिंह / लोकमत न्यूज नेटवर्क
नागपूर : कोरोना संक्रमणामुळे जिल्ह्याची स्थिती अतिशय बिकट झाली आहे. झोन स्तरावर विचार केल्यास हनुमाननगर, लक्ष्मीनगर, नेहरूनगर आणि मंगळवारी झोन परिसरात संक्रमण बेलगाम झाले आहे. फेब्रुवारीच्या मधात संक्रमणाने वेग पकडल्यापासून मार्च व एप्रिलमध्ये संक्रमणाने दरदिवशी नवे रेकॉर्ड स्थापित केले आहेत. प्रारंभिक चरणात मनपाकडून संक्रमितांचे आकडे जाहीर करण्यात आले नव्हते. मात्र, गेल्या तीन दिवसांपासून झोन स्तरावर संक्रमितांचे आकडे आकडे जाहीर करण्यात येत आहेत. या तीन दिवसांत प्राप्त अहवालाचे विश्लेषण केल्यास हनुमाननगर झोनची स्थिती भयावह झाली आहे. तीन दिवसात या झोनमध्ये सर्वाधिक २,०७७ संक्रमित आढळले आहेत. दुसऱ्या क्रमांकावर १,८६७ रुग्णांसह लक्ष्मीनगर तर तिसऱ्या क्रमांकावर १,७७० रुग्णांसह नेहरूनगर झोन आहे.
आश्चर्यजनक बाब म्हणजे कोरोनाच्या पहिल्या लाटेत सतरंजीपुरा व गांधीबाग झोनमधून सर्वाधिक संक्रमित सापडले होते. दुसऱ्या लाटेत या दोन्ही झोनमध्ये संक्रमितांची संख्या सर्वात कमी आहे. तीन दिवसात सतरंजीपुरा झोनमध्ये ३३५, गांधीबाग झोनमध्ये ७३० संक्रमित सापडले आहेत. मनपाकडून करवण्यात आलेल्या सर्वेक्षणात पहिल्या लाटेत सतरंजीपुरा व गांधीबाग झोन हॉटस्पॉट ठरले होते. त्यामुळे या दोन्ही झोनमधील ४० टक्के लोकसंख्या संक्रमित असल्याचा अंदाज व्यक्त केला जात आहे. त्यांच्यात हर्ड इम्युनिटी विकसित झाल्याने दुसऱ्या लाटेत संक्रमण कमी असल्याचे समजले जात आहे. जेव्हा की पहिल्या लाटेत जेथे संक्रमितांची संख्या कमी होती तेथे दुसऱ्या लाटेत संक्रमण अनियंत्रित झाल्याची स्थिती आहे.
------------------
नेहरूनगर, हनुमाननगर, धंतोलीमध्ये सर्वाधिक मृत्यू
झोन स्तरावर प्राप्त माहितीचे विश्लेषण केल्यास तीन दिवसात नेहरूनगर झोनमध्ये सर्वाधिक मृत्यू झाले आहेत. या झोनमध्ये १७ संक्रमितांचा जीव गेला. हनुमाननगरमध्ये १५, धंतोलीमध्ये १४, मंगळवारीमध्ये १३, धरमपेठमध्ये १२, लकडगंजमध्ये ११, आसीनगरमध्ये ११, लक्ष्मीनगरमध्ये १०, गांधीबागमध्ये ९ आणि सतरंजीपुरा झोनमध्ये सर्वात कमी ८ मृत्यूंची नोंद झाली आहे.
---------------
कोरोना संक्रमणाची स्थिती
झोन - १८ एप्रिल - १७ एप्रिल - १६ एप्रिल - एकूण
लक्ष्मीनगर - ५९१ - ६४८ - ६२८ - १८६७
धरमपेठ - ५२३ - ४७६ - ३७५ - १३७४
हनुमाननगर - ७३१ - ६९९ - ६४७ - २०७७
धंतोली - ४१९ - ५६६ - ३५५ - १३४०
नेहरूनगर - ६०८ - ५९१ - ५७१ - १७७०
गांधीबाग - ३३२ - २१२ - १८६ - ७३०
सतरंजीपुरा - ११६ - ११८ - १०१ - ३३५
लकडगंज - ३८३ - २५८ - २८८ - ९२९
आसीनगर - ४१० - २८८ - २९३ - १३९२
मंगळवारी - ४८९ - ६४७ - ३३५ - १४७१
.........................