दोन अंध ग्राहकांना २४ तासात वीजजोडणी ()

लोकमत न्यूज नेटवर्क

नागपूर : कार्यालयात वारंवार चकरा मारूनही वीजजोडणी मिळत नसल्याची अनेक उदाहरणे आहेत. परंतु स्वत: पुढाकार घेऊन दोन अंध ग्राहकांना अवघ्या २४ तासात वीजजोडणी देऊन महावितरणने एक नवीन आदर्श घालून दिला. संवेदनशील कर्मचाऱ्याच्या कार्यामुळे त्यांचे कौतुक केले जात आहेत.

खापरखेडा उपविभाग अंतर्गत दहेगाव रंगारी येथील दिनेश मथुरे व शारदा मथुरे हे अंध दाम्पत्य वाॅर्ड नं. ३ येथे वास्तव्यास आहे. तसेच सूरज शंकर रंधाई हे दोन्ही डोळ्यांनी अंध असलेले गृहस्थ आपल्या आईसोबत इटणगोटी येथे राहतात. या दोन्ही अंध नागरिकांना विद्युत पुरवठ्याची आवश्यकता होती. परंतु त्यासाठी कार्यालयात जाऊन अथवा ऑनलाइन अर्ज करणे त्यांना अडचणीचे ठरत होते.

दहेगाव रंगारी येथील ग्रामपंचायतीच्या मासिक सभेमध्ये अंध ग्राहकाची समस्या खापरखेडा उपविभागीय कार्यालयातील उपकार्यकारी अभियंता मंगेश काहाळे यांच्यापर्यंत पोहचली. त्यांच्या निर्देशानुसार पाटणसावंगी ग्रामीण वितरण केंद्रातर्फे शारदा मथुरे यांना २४ तासाच्या आत वीजजोडणी देण्यात आली. दुसरे अंध ग्राहक सूरज रंधाई यांना वीजजोडणी मिळावी यासाठी पाटणसावंगी शहर वितरण केंद्रात कार्यरत असलेले कनिष्ठ अभियंता आशिष चेटुले व विद्युत सहायक रितेश ठाकरे यांनी सहानुभूतीपूर्वक तातडीने कार्यवाही केली. त्यांनी रंधाई यांचा अर्ज मिळताच डॉ. बाबासाहेब आंबेडकर जीवन प्रकाश योजनेंतर्गत २४ तासांच्या आत वीजपुरवठा करून उपलब्ध दिला.