लोकमत न्यूज नेटवर्क
नागपूर : भाजपचे नगरसेवक विक्की कुकरेजा हे आपल्या कार्यकर्त्यांसह काँग्रेसचे कार्यकर्ते बाबू खान यांना मारहाण करीत असल्याचे व्हिडीओ फुटेज अखेर समोर आले. उत्तर नागपूरकाँग्रेस कमिटीने शुक्रवारी पत्रकार परिषदेत हा पुरावा सादर केला.
काँग्रेसच्या अनुसूचित जाती विभागाचे राष्ट्रीय समन्वयक अनिल नगरारे व ब्लॉक अध्यक्ष सुरेश पाटील यांनी पत्रकार परिषदेत संगितले की, त्या दिवशीच्या घटनेचे काही व्हिडिओ फुटेज होते; परंतु नेमके मारहाणीचे फुटेज गायब होते. नगरसेविका नेहा निकासे यांच्या प्रयत्नाने अखेर मारहाणीचे फुटेजही समोर आले. या फुटेजमध्ये भाजपचे नगरसेवक विक्की कुकरेजा, नगरसेवक महेंद्र धनवीज, भाजपचे उत्तर नागपूरचे मंडळ अध्यक्ष संजय चौधरी व इतर कार्यकर्ते बाबू खान यांना मारहाण करताना स्पष्टपणे दिसून येत आहेत. हे पुरावे आम्ही पोलिसांना सादर करणार असून, त्यांनी इतरांचा शोध घ्यावा. खरे तर हे पुरावे पोलिसांनीच शोधून काढायला हवे होते; परंतु त्यांना हे पुरावे का सापडले नाहीत, हा प्रश्न आहे. पोलीस आयुक्त व पोलीस प्रशासन कुणाच्या दबावात काम करीत आहे, याचा खुलासाही त्यांनी करावा, अशी मागणी यावेळी करण्यात आली.
माजी मुख्यमंत्री व विधानसभेतील विराेधी पक्षनेते देवेंद्र फडणवीस हे आरोपीला वाचवीत असून, पोलीस त्यांच्या दबावात काम करीत असल्याचा आरोपही यावेळी करण्यात आला. पत्रकार परिषदेला नगरसेविका नेहा निकोसे, रत्नाकर जयपूरकर, माजी नगरसेवक सुरेश जग्यासी, गौतम अंबाद यांच्यासह कार्यकर्ते मोठ्या संख्येने उपस्थित होते.
माझ्या कार्यालयात काँग्रेस कार्यकर्त्यांकडून तोडफोड : कुकरेजा
- माझ्या कार्यालयात काँग्रेस कार्यकर्त्यांकडून तोडफोड दरम्यान भाजपचे नगरसेवक वीरेंद्र कुकरेजा यांनी यावर सांगितले की, काँग्रेस कार्यकर्त्यांनी शुक्रवारी जो व्हिडीओ दाखविला तो आधीच पोलिसांकडे आहे. त्यात काहीही नवीन नाही. माझ्या कार्यालयात काँग्रेस कार्यकर्त्यांनी तोडफोड केली. तोडफोड करून पळून जात असताना आम्ही त्यांना रोखण्याचा प्रयत्न केला. नागरिकांना सर्व काही माहिती आहे, असेही ते म्हणाले.