लोकमत न्यूज नेटवर्क, नागपूर : काँग्रेस आमदार राजू पारवे यांनी गुरुवारी रात्री उपमुख्यमंत्री देवेंद्र फडणवीस यांची भेट घेतली. रामटेक लोकसभेच्या जागेबाबत महायुतीची नेमकी भूमिका अद्यापही निश्चित झालेली नाही. या पार्श्वभूमीवर पारवे यांच्या भेटीवरून विविध कयास लावण्यात येत आहे.
प्रदेशाध्यक्ष चंद्रशेखर बावनकुळे यांनी मात्र पारवे यांची भेट डीपीसी फंडाबाबत असल्याचा दावा केला.गुरुवारी रात्री पारवे यांनी फडणवीस यांच्या धरमपेठ येथील निवासस्थानी भेट घेतली. सुमारे अर्धा तास त्यांच्यात चर्चा झाली.
रामटेक मतदारसंघाबाबत शिवसेना शिंदे गटाने त्या जागेवर दावा केला आहे, तर भाजपला ती जागा हवी आहे. नवीन चेहरा म्हणून पारवे यांना पक्षप्रवेश करत तिकीट दिले जाण्याची शक्यता वर्तविण्यात येत आहे.