आलेसूर, पुल्लरमध्ये काँग्रेसचा झेंडा

लाेकमत न्यूज नेटवर्क

भिवापूर : तालुक्यातील तीन ग्रामपंचायतींच्या सरपंच व उपसरपंचपदाची निवडणूक गुरुवारी (दि. ११) पार पडली. यात आलेसूर व पुल्लर ग्रामपंचायतीवर काँग्रेस समर्थित गटाने सत्ता मिळविली. माेखाबर्डी येथे काँग्रेस समर्थित गटातील अंतर्गत मतभेदाचा फायदा घेत भाजप समर्थित गटाने सरपंच-उपसरपंचपदाच्या निवडणुकीत बाजी मारली.

आलेसूर येथे दिलीप दोडके यांची सरपंचपदी तर राजू बनकर यांची उपसरपंचपदी निवड करण्यात आली. दाेघेही काँग्रेस समर्थित गटाचे सदस्य आहेत. पुल्लर येथे सरपंचपदी काँग्रेस समर्थित गटाच्या सोनल तिरपुडे आणि उपसरपंचपदी हिरालाल राऊत यांची निवड करण्यात आली. माेखाबर्डी येथे काँग्रेस समर्थित गटाला अंतर्गत मतभेदाचा फटका बसल्याने भाजप समर्थित गटाने डाव साधला. येथे आ. राजू पारवे यांनी काँग्रेस समर्थित गटाचे तीन व काँग्रेस समर्थित बंडखाेर गटाचे दाेन अशा पाच सदस्यांना एकत्र आणण्याचा प्रयत्न केला. त्यामुळे ही ग्रामपंचायत काँग्रेस समर्थित गटाकडे जाईल, अशी शक्यताही व्यक्त केली जात हाेती. मात्र, सरपंच व उपसरपंचपदासाठी उमेदवारी अर्ज दाखल केल्यानंतर त्यांच्या गटाचे सदस्य मतदानाला गैरहजर राहिले. त्यामुळे येथे भाजप समर्थित गटाच्या रूपाली साेनटक्के तर उपसरपंचपदी राेशन गायधने यांनी बाजी मारली.

....

गटनिहाय बलाबल

भिवापूर तालुक्यातील तीन ग्रामपंचायतींमधील प्रत्येकी नऊ जागांसाठी सार्वत्रिक निवडणूक पार पडली हाेती. यात आलेसूर व मोखाबर्डी येथे काँग्रेस समर्थित गटांमध्ये लढत झाली. आलेसूर येथे काँग्रेस समर्थित दाेन्ही गटांनी विजय संपादन केल्याने भाजप समर्थित गटाच्या पदरी निराशा पडली. माेखाबर्डी येथे भाजप समर्थित गटाने चार, काँग्रेस समर्थित गटाने तीन तर वसंत ढाेणे यांच्या नेतृत्वातील काँग्रेस समर्थित बंडखाेर गटाने दाेन जागा जिंकल्या. पुल्लर येथे काँग्रेस समर्थित गटाने सहा तर भाजप समर्थित गटाने तीन जागांवर विजय संपादन केला.

....

अंतर्गत कलह भाेवला

माेखाबर्डी हे पंचायत समिती सभापती ममता शेंडे तसेच पंचायत समितीचे माजी उपसभापती वसंता ढाेणे यांचे मूळ गाव हाेय. वसंता ढाेणे यांच्या पत्नी छाया ढाेणे यांना काँग्रेस गटाने उमेदवारी नाकारल्याने त्यांनी बंडखाेरी करीत पॅनल उभे केले हाेते. मागील पंचायत समिती निवडणुकीत काँग्रेसच्या ममता शेंडे यांनी अपक्ष छाया ढाेणे यांना पराभूत केले हाेते. ग्रामपंचायत निवडणुकीत मात्र छाया ढाेणे व ममता शेंडे यांचे सासरे तुळशिदास शेंडे यांनी वेगवेगळ्या वाॅर्डमधून निवडणूक लढविली. यात छाया ढाेणे विजयी झाल्या तर तुळशिदास शेंडे यांना पराभवाला सामाेरे जावे लागले. पंचायत समिती निवडणुकीतील कलह या वेळी ग्रामपंचायत निवडणुकीत उफाळून आला. छाया ढाेणे या सरपंचपदाच्या उमेदवार असल्याने ममता शेंडे गटाचे ग्रामपंचायत सदस्य मतदानाला गैरहजर राहिले.