भाजपच्या लीडसोबत दावेदारही वाढले

लोकसभा निवडणुकीत भाजपचे राष्ट्रीय नेते नितीन गडकरी यांनी सहाही विधानसभा मतदारसंघात आघाडी घेत एकतर्फी विजय नोंदविला. आता गडकरींच्या

पश्चिम व दक्षिणमध्ये घमासान : काँग्रेसमध्येही रस्सीखेच

कमलेश वानखेडे - नागपूर

लोकसभा निवडणुकीत भाजपचे राष्ट्रीय नेते नितीन गडकरी यांनी सहाही विधानसभा मतदारसंघात आघाडी घेत एकतर्फी विजय नोंदविला. आता गडकरींच्या या विजयात आपला मोलाचा वाटा असल्याचे दावे विधानसभेसाठी इच्छुक असणार्‍यांकडून केले जात आहेत. भाजपची लीड वाढलेली दिसताच पश्चिम नागपूर व दक्षिण नागपुरात उमेदवारीसाठी इच्छुकांचीही संख्या वाढली आहे. या दोन्ही मतदारसंघात प्रत्येकी चार ते पाच दावेदार असल्यामुळे तिकीट मिळविण्यासाठी मोठी चुरस पहायला मिळणार असून यातून अंतर्गत नाराजी उफाळून येण्याचा धोका दिसू लागला आहे. गेल्या विधानसभा निवडणुकीत पश्चिम नागपुरात भाजपचे आ. सुधाकरराव देशमुख यांनी काट्याच्या लढतीत काँग्रेसचे अनिस अहमद यांना जेमतेम... हजार मतांनी मात दिली. या वेळी नगरसेवक प्रकाश गजभिये व नितीश ग्वालबंसी हे बंडखोरी करीत अपक्ष म्हणून रिंगणात उतरले होते. गजभिये यांनी २२ हजार मते तर ग्वालबंसी यांनी १२ हजार एवढी मते घेतली. यातील बहुतांश मते काँग्रेसच्या वाट्याचीच होती. असे असतानाही सुधाकरराव काठावर तरले. या आकडेवारीच्या आधारावर लोकसभा निवडणुकीचे अंदाज बांधले जात होते. येथे काँग्रेस दोन-चार हजारानी का होईना पण पुढे राहील, असे दावे केले जात होते. मात्र, बहुसंख्य दलित, मुस्लीम, ख्रिश्चन, आदिवासी, कुणबी मतदार असलेल्या पश्चिममध्ये गडकरींनी तब्बल ३७ हजार १५ मतांची आघाडी घेतली.लोकसभा निवडणुकीपूर्वी सुधाकरराव देशमुख हे आता विधानसभेची निवडणूक लढणार नाहीत, त्यांच्या जागी दुसरा उमेदवार दिला जाईल, अशी चर्चा भाजपच्या गोटात रंगली होती. तशी मानसिक तयारीही देशमुख समर्थकांनी चालविली होती. मात्र, लोकसभेची लीड पाहताच देशमुख समर्थकांमध्ये उत्साह संचारला आहे. ‘लीड पर रहा वेस्ट, सुधाकराव है बेस्ट’ असे त्यांचे समर्थक बोलू लागले आहेत. सुधाकरराव गडकरींचे निवडणूक प्रभारी होते. संघशिक्षक असल्यामुळे संघाच्याही जवळचे आहेत. त्यांची मर्जी विचारात घेऊनच त्यांच्या बाबतीत निर्णय घेतला जाईल, असा दावा समर्थक करीत आहेत. असे असले तरी लोकसभा निवडणुकीत अपक्ष नगरसेवक मुन्ना पोकुलवार, मीना चौधरी यांचे पुत्र कमलेश चौधरी यांची मोट बांधून गडकरींसाठी जोमाने लागलेले अपक्ष नगरसेवक परिणय फुके यांच्या भाजपकडून अपेक्षा वाढल्या आहेत. आरोग्य शिबिर, विविध अभियानाच्या माध्यमातून ते पश्चिममध्ये कामाला लागले आहेत. आपल्याला कामाचे फळ मिळेल, असा त्यांना विश्वास आहे. पण सुधाकररावांनी थांबायचे ठरवले तरी त्यांच्या जागेसाठी गेल्या अनेक वर्षांपासून भाजपमध्ये काम करणार्‍या जुन्या इच्छुकांची संख्या मोठी आहे. प्र्रदेशाध्यक्ष आ. देवेंद्र फडणवीस यांचे विश्वासू शशिकांत बोदड, राष्ट्रीय नेते संजय जोशी यांच्याशी मैत्री असलेले रमेश चोपडे, नगरसेवक जगदीश ग्वालबंसी, माजी महापौर मायाताई इवनाते, नगरसेवक साधना बरडे, भूषण शिंगणे यांचाही दावा तगडा आहे. त्यामुळे सुधाकररावांनी गादी सोडली तर भाजपची डोकेदुखी आणखीनच वाढण्याची शक्यता आहे. काँग्रेसमध्येही मलखांब सुरू आहे. राज्यमंत्री राजेंद्र मुळक यांनी लोकसेवा प्रतिष्ठानाच्या माध्यमातूम काम सुरू केले आहे. काँग्रेसचे काही नगरसेवक त्यांनी हाताशी धरले आहेत.