तात्काळ तिकिटाच्या वेळापत्रकात बदल

तात्काळ तिकिटाच्या वेळापत्रकात रेल्वे मंत्रालयाने बदल केला असून १५ जूनपासून प्रवासाच्या एक दिवसापुर्वी सकाळी १० वाजेपासून वातानुकूलित कोचचे तर ११ वाजेपासून स्लिपर क्लासचे तात्काळचे तिकीट घेता येईल.

दलालांवर अंकुश : १० वाजता एसीचे, ११ पासून स्लिपरचे होणार आरक्षण
नागपूर : तात्काळ तिकिटाच्या वेळापत्रकात रेल्वे मंत्रालयाने बदल केला असून १५ जूनपासून प्रवासाच्या एक दिवसापुर्वी सकाळी १० वाजेपासून वातानुकूलित कोचचे तर ११ वाजेपासून स्लिपर क्लासचे तात्काळचे तिकीट घेता येईल. दरम्यान प्रवासी तिकीट सुविधा केंद्र, रेल ट्रॅव्हल सर्व्हिस एजंट, आयआरसीटीसीच्या एजंटला तात्काळ तिकिटाची प्रक्रिया सुरू झाल्यानंतर ३० मिनिटानंतर तात्काळ तिकीट घ्यावे लागणार आहे.
रेल्वे प्रवासाच्या एक दिवस आधी सकाळी १० वाजता तात्काळचे तिकीट खरेदी करण्याची सुविधा पूर्वी होती. परंतु एजंट आणि सर्व सामान्य नागरिक एकाच वेळी तात्काळ तिकिटासाठी प्रयत्न करीत असल्यामुळे बहुतांश नागरिकांना तात्काळच्या रांगेत उभे राहुनही कन्फर्म तिकीट मिळत नव्हते.
यात स्लिपरक्लास आणि एसी कोचसाठी तात्काळचे तिकीट खरेदी करण्याच्या वेळा वेगवेगळ्या करण्यात आल्या आहेत. एसी कोचचे तात्काळ तिकीट खरेदी करणाऱ्या प्रवाशांना १० वाजेपासून तर स्लिपरचे तात्काळ तिकीट खरेदी करणाऱ्या प्रवाशांना ११ वाजेपासून तिकीट खरेदी करता येणार आहे.
यात आयआरसीटीसीचे एजंट, प्रवासी तिकीट सुविधा केंद्राचे एजंट आणि रेल ट्रॅव्हल सर्व्हिस एजंटला तात्काळची प्रक्रिया सुरू झाल्यानंतर ३० मिनिटे तिकीट खरेदी करता येणार नाही.
रेल्वे मंत्रालयाच्या या निर्णयामुळे सर्व सामान्य नागरिकांना तात्काळचे ‘कन्फर्म’ तिकीट मिळणार असल्याची शक्यता वर्तवण्यात येत आहे. (प्रतिनिधी)