सिटी सर्व्हेतील लाचखोर महिला जेरबंद

साडेतीन हजारांची लाच स्वीकारताना सिटी सर्व्हे कार्यालयातील परिरक्षण भूमापक

नागपूर : साडेतीन हजारांची लाच स्वीकारताना सिटी सर्व्हे कार्यालयातील परिरक्षण भूमापक मीना फुलचंद रामटेके ऊर्फ मीना राजेंद्र गंधे हिला रंगेहात पकडण्यात आले. आठ दिवसांपूर्वी दोन हजारांची लाच घेताना सुषमा भगत हिला एसीबीच्या पथकाने पकडले होते. एकाच कार्यालयात एकाच पदावरील दोन महिलांना आठ दिवसात लाच घेताना एसीबीने पकडल्याचा हा पहिलाच प्रकार ठरला असून, यामुळे या कार्यालयात भ्रष्टाचार कसा फोफावला आहे, त्याची प्रचिती येते.

वाहतूक व्यावसायिक गजानन जगन्नाथ लोहे (वय ४२) हे प्रेमनगरातील चित्रशाळा मंदिराजवळच्या श्रीराम सोसायटीत राहातात. वडिलोपार्जित घराचे नामांतरण कुटूंबीयांचे नावावर करण्याकरीता त्यांनी नगर भूमापन कार्यालयात २९ एप्रिलला अर्ज केला होता. तो पुढच्या कारवाईसाठी परिरक्षण भूमापक मीना रामटेके गंधे यांच्याकडे होता. मीनाने हे काम करून देण्यासाठी ३,५00 रुपयांची मागणी केली. पैसे दिल्याशिवाय काम करून मिळणार नाही, याची खात्री पटल्यामुळे आणि लाच द्यायची तयारी नसल्यामुळे लोहे यांनी एसीबीकडे तक्रार नोंदवली. शहानिशा केल्यानंतर एसीबीचे उपायुक्त वसंत शिरभाते, अतिरिक्त अधीक्षक संजय पुरंदरे यांच्या मार्गदर्शनाखाली सापळा रचण्यात आला. ठरल्याप्रमाणे आज दुपारी लाचेची रक्कम घेऊन लोहे मीनाकडे गेले. तिने ही रक्कमओमप्रकाश पुनाजी बालपांडे याच्याकडे द्यायला सांगितली. बालपांडेने ही रक्कम स्वीकारताच बाजूलाच दबा धरून बसलेले एसीबीचे पोलीस निरीक्षक भारत क्षीरसागर, पोलीस निरीक्षक राजू बहादूरे, हवलदार दिलीप जाधव, धर्मेंंद्र काळे, शिपाई चंद्रनाग ताकसांडे यांनी बालपांडे आणि मीनाला जेरबंद केले. या दोघांवरही सदर पोलीस ठाण्यात गुन्हे दाखल करण्यात आले. (प्रतिनिधी)