मेडिकलमध्ये काँग्रेस नेत्यांना पुष्पगुच्छ, तर लसीकरणात भाजप कार्यकर्त्यांची चमकोगिरी

लोकमत न्यूज नेटवर्क

नागपूर : कोरोनाच्या दुसऱ्या लाटेमुळे संपूर्ण जिल्हा हादरला असून वैद्यकीय मदतीसाठी रुग्णांच्या नातेवाईकांची धावाधाव सुरू आहे. मात्र दुसरीकडे राजकीय नेते व पदाधिकाऱ्यांकडून बेजबाबदारपणाचे प्रदर्शन होताना दिसून येत आहे. मेडिकलच्या स्थितीचा आढावा घ्यायला गेलेले काँग्रेसचे प्रदेशाध्यक्ष पदाधिकाऱ्यांच्या उपस्थितीत चक्क अधिष्ठात्यांकडून सत्कार स्वीकारताना दिसून आले. तर दुसरीकडे लसीकरणाच्या एका केंद्रावर भाजपचे पदाधिकारी व कार्यकर्त्यांनी ‘सोशल डिस्टन्सिंग’ला धाब्यावर बसवत ‘फोटोसेशन’ केले. ‘सोशल मीडिया’वर ‘व्हायरल’ होत असलेल्या या दोन्ही छायाचित्रांमुळे अनेकांनी नाराजी व्यक्त केली आहे.

कॉंग्रेसचे प्रदेशाध्यक्ष नाना पटोले हे मेडिकलच्या स्थितीचा आढावा घेण्यासाठी गेले होते. यावेळी त्यांच्यासमवेत शहराध्यक्ष आ. विकास ठाकरे हेदेखील होते. दोन्ही नेते आमदार असल्यामुळे मेडिकलच्या अधिष्ठात्यांनी त्यांचे पुष्पगुच्छ देऊन स्वागत केले. विशेष म्हणजे नेत्यांनी त्याचा स्वीकारदेखील केला. यावेळी अधिष्ठात्यांच्या दालनात काँग्रेसचे आणखी चार पदाधिकारीदेखील होते. एकीकडे मेडिकलमध्ये स्थिती गंभीर झाली आहे. रुग्णांना बेड मिळत नसून व्हेंटिलेटर्स, ऑक्सिजन, इंजेक्शनची कमतरता आहे. मेडिकलमध्ये कमी मनुष्यबळात काम सुरू आहे. अशा स्थितीत वैद्यकीय क्षेत्राशी काहीच संबंध नसलेल्या पदाधिकाऱ्यांसह तेथे जाण्याची काय गरज होती व सध्याच्या स्थितीचे काही सोयरसुतक नाही का, असा सवाल ‘सोशल मीडिया’वर उपस्थित करण्यात येत आहे. सूत्रांनी दिलेल्या माहितीनुसार नाना पटोले यांनी अगोदर पुष्पगुच्छ स्वीकारण्यास नकार दिला होता.

लसीकरण केंद्रातून भाजपचा प्रचार?

भाजपतर्फेदेखील अशाच पद्धतीचा कारभार सुरू आहे. नागपूर मनपातर्फे सीताबर्डी येथील बुटी दवाखान्यात सहा दिवसांअगोदर कोरोना लसीकरण केंद्र सुरू करण्यात आले. याची पाहणी करण्यासाठी धरमपेठ झोनचे सभापती सुनील हिरणवार, नगरसेविका उज्ज्वला शर्मा, प्रसन्ना पातुरकर यांनी दौरा केला. यावेळी त्यांच्यासोबत परिसरातील भाजप व भाजयुमो कार्यकर्तेदेखील होते. या लोकांना आपण लसीकरण केंद्रात आहोत याचेदेखील भान राहिले नाही आणि हिरणवार यांच्यासह सीताबर्डीतील कार्यकर्ता असलेल्या अमित पाठक व इतर काही जणांनी चक्क ‘फोटोसेशन’ केले. लसीकरण केंद्रावर इतक्या लोकांना परवानगी कशी काय देण्यात आली आणि लसीकरणाच्या माध्यमातून भाजपचा प्रचार सुरू होता का, असा प्रश्न उपस्थित होत आहे.