मोटरसायकलच्या धक्क्यातून हत्या : कावरापेठ चौकात घडला होता थरारनागपूर : लकडगंज पोलीस ठाण्याच्या हद्दीत कावरापेठ चौकात तीन वर्षांपूर्वी मोटरसायकलच्या धक्क्यातून झालेल्या एका तरुणाच्या हत्येप्रकरणी अतिरिक्त सत्र न्यायाधीश डी. डी. खोचे यांच्या न्यायालयाने एकूण दहा आरोपींपैकी दोन जणांना जन्मठेप आणि प्रत्येकी तीन हजार रुपये दंडाची शिक्षा सुनावली. तीन आरोपींना एक वर्ष सश्रम कारावास, प्रत्येकी एक हजार रुपये दंड, दोन जणांची चांगल्या वर्तणुकीच्या हमीवर सुटका केली आणि तीन जणांना सबळ पुराव्याअभावी संशयाचा लाभ देऊन निर्दोष सोडले. सचिन हरिनारायण पावनकर रा. लालगंज आणि मनीष देवनाथ सदावर्ते रा.मेंहदीबाग रोड रामनगर, अशी जन्मठेपेची शिक्षा झालेल्या आरोपींची नावे आहेत. महेश मोतीलाल पराते, गौरव सूर्यकांत ढवळे दोन्ही रा. लालगंज आणि दीपक गुलाबराव ढोबळे रा. बस्तरवारी, अशी एक वर्ष कारावासाची शिक्षा झालेल्या आरोपींची नावे आहेत. अंकुश दिलीप बिनेकर आणि नेहाल गुलाब चौधरी दोन्ही रा. बस्तरवारी या दोन आरोपींना चांगल्या वर्तणुकीच्या हमीवर सोडण्यात आले. तर मोहम्मद तौकीर मोहम्मद फारुखी रा. दहीबाजार, मंगेश ओप्रकाश बिनेकर रा. मानेवाडा आणि प्रभाकर सुरेश बिनेकर रा. बस्तरवारी , अशी निर्दोष सुटका झालेल्या आरोपींची नावे आहेत. सुमित चोखीलाल श्रीवास (२२), असे मृताचे नाव होते. तो टिमकीच्या बाबा रामसुमेरनगर येथील रहिवासी होता. खुनाची घटना २१ मे २०१३ रोजी रात्री ११ वाजताच्या सुमारास घडली होती. खटल्याची पार्श्वभूमी अशी, घटनेच्या दिवशी सुमित श्रीवास हा आपला मित्र गणेश सिन्हा याच्यासोबत मोटरसायकलवर कावरापेठ रेल्वे क्रॉसिंगकडून येत होता. रेल्वे फाटक बंद असल्याने ते थांबले होते. त्यावेळी सुमितच्या मोटरसायकलचा धक्का एका आरोपीच्या मोटरसायकलला लागला होता. त्यामुळे दोघांमध्ये बाचाबाची झाली होती. धोक्याची शक्यता लक्षात घेऊन सुमित हा रेल्वे फाटकातून निसटून कावरापेठ चौकाकडे पळून जाऊ लागला होता. त्याच वेळी काही आरोपींनी तीन मोटरसायकलींवर स्वार होऊन त्याचा पाठलाग सुरू केला होता. त्यांनी कावरापेठ चौकात सुमितला घेराबंदी करून हातबुक्क्यांनी मारहाण करणे सुरू केले होते. त्याच वेळी सचिन पावनकर आणि मोहम्मद तौकीर हे मारोती कारने आले होते. त्यांनी कारमधून उतरून सुमितच्या पोटावर चाकूने सपासप वार करून रक्ताच्या थारोळ्यात लोळवले होते. (प्रतिनिधी)१४ साक्षीदार तपासलेकावरापेठ चौकातच सुमितचा भाऊ राकेश याची पानटपरी होती. आपल्या भावावर हल्ला होताना पाहून तो बचावासाठी गजानन उईके याला सोबत घेऊन धावला असता आरोपी घटनास्थळावरून पळून गेले होते. सुमितला उपचारार्थ खासगी इस्पितळात दाखल करण्यात आले असता त्याचा मृत्यू झाला होता. राकेश श्रीवास याच्या तक्रारीवरून लकडगंज पोलिसांनी भादंविच्या १४३, १४७, १४८, १४९, ३०२ कलमान्वये गुन्हा दाखल करून एकेक करीत सर्व दहा आरोपींना अटक केली होती. पोलीस निरीक्षक धनंजय सोनवणे यांनी तपास करून आरोपींविरुद्ध न्यायालयात आरोपपत्र दाखल केले होते. न्यायालयात एकूण १४ साक्षीदार तपासण्यात आले होते. न्यायालयात सरकारच्यावतीने अतिरिक्त सरकारी वकील गिरीश दुबे , फिर्यादीच्या वतीने अॅड. विलास सेलोकर आरोपींच्या वतीने अॅड. चंद्रशेखर जलतारे, अॅड. एस. बी. चौरसिया, अॅड. सी. आर. ठाकूर, अॅड. राम मासुरके यांनी काम पाहिले.
दोघांना जन्मठेप
By admin | Updated: July 2, 2016 03:14 IST