बॉम्बच्या अफवेने इमरजन्सी लॅन्डिंग

भुवनेश्वरहून मुंबईकडे जाणाऱ्या गो एअरच्या प्रवासी विमानात बॉम्ब असल्याच्या निनावी फोनने शनिवारी सकाळी एकच खळबळ उडाली.

गो- एअरचे विमान नागपुरात : प्रशासनाची तारांबळ
नागपूर : भुवनेश्वरहून मुंबईकडे जाणाऱ्या गो एअरच्या प्रवासी विमानात बॉम्ब असल्याच्या निनावी फोनने शनिवारी सकाळी एकच खळबळ उडाली. अखेर हे वृत्त खोटे ठरल्यानंतर डॉ. बाबासाहेब आंबेडकर आंतरराष्ट्रीय विमानतळावरील तपास यंत्रणेने सुटकेचा नि:श्वास सोडला.
गो एअर कंपनीच्या जी८-२४३ या भुवनेश्वर ते मुंबई या मार्गावरील विमानात बॉम्ब असल्याचा निनावी फोन भुवनेश्वर विमानतळावर आला. या घटनेची सूचना नागपूर विमानतळ प्राधिकरण आणि नागपूर पोलिसांना मिळाली. विमानतळ प्राधिकरणाच्या परवानगीनंतर विमान तातडीने सकाळी ९.३५ वाजता नागपूर विमानतळावरील बाजूच्या धावपट्टीवर उतरविण्यात आले.
सुरक्षेच्या दृष्टीने विमानाभोवती सुरक्षा पथकाने घेराव केला. सीआयएसएफच्या बॉम्ब निरोधक पथकाने १५३ प्रवाशांना खाली उतरविले आणि विमानाची तपासणी केली. तपासणी पथकाला स्फोटके आढळून आली नाहीत. विमानाने भुवनेश्वरवरून सकाळी ८.२० वाजता उड्डाण भरले होते. तपासणीनंतर विमानाने नागपूर विमानतळावरून भुवनेश्वरकडे दुपारी १२.२२ वाजता उड्डाण भरले.
प्राप्त माहितीनुसार विमानात बॉम्ब असल्याचा निनावी फोन भुवनेश्वर विमानतळावर विमानाने उड्डाण भरल्यानंतर आला. भुवनेश्वर प्राधिकरणाने या घटनेची सूचना नागपूर, मुंबई आणि दिल्ली येथे दिली. त्यानंतर विमानाचे इमरजन्सी लॅण्डिंग करून तपासणी करण्यात आली. विमानात एक बेवारस बॅग असल्याची सूचना मिळाली होती. त्याआधारे विमानाची तपासणी करण्यात आली. ही बॅग फ्लाईट इंजिनिअरची असल्याची माहिती आहे. तो ही बॅग भुवनेश्वर येथे विसरला होता. (प्रतिनिधी)

सुरक्षा यंत्रणा वेठीस धरणारा जेरबंद
विमानात बॉम्ब असल्याचे सांगून सर्वत्र खळबळ उडवून देणाऱ्या आरोपीला पुण्यात अटक करण्यात आली. पुण्याचे पोलीस आयुक्त कौशल किशोर पाठक यांनी लोकमतशी बोलताना या वृत्ताला दुजोरा दिला. संजयकुमार मिश्रा (वय ३५, रा. धायरी, पुणे) असे त्याचे नाव असून तो मूळचा भुवनेश्वर (ओरिसा) येथील रहिवासी आहे. विशेष म्हणजे, त्याने आज पहाटे पुणे पोलिसांच्या नियंत्रण कक्षाला फोन करून पुणे रेल्वेस्थानक उडवून देण्याची धमकी दिली होती. फोन नंबरवरून आरोपीचा माग काढत आरोपी मिश्राला दौंड पोलिसांनी पाटस येथे ताब्यात घेतले. चौकशीत त्याने भुवनेश्वर-मुंबई विमानात बॉम्ब ठेवल्याचा फोन केल्याचे उघड झाले.