विदर्भातून भारती, मोझम्मील ‘टॉप’

सीबीएसई’च्या (सेंट्रल बोर्ड आॅफ सेकंडरी एज्युकेशन) दहावीच्या परीक्षेचा निकाल सोमवारी जाहीर करण्यात आला. यामध्ये नागपुरातील सेंट्रल इंडिया पब्लिक स्कूलचा मोझम्मील खलील

 ‘सीबीएसई’ दहावी निकाल : निकालाची टक्केवारी वाढली

नागपूर : ‘सीबीएसई’च्या (सेंट्रल बोर्ड आॅफ सेकंडरी एज्युकेशन) दहावीच्या परीक्षेचा निकाल सोमवारी जाहीर करण्यात आला. यामध्ये नागपुरातील सेंट्रल इंडिया पब्लिक स्कूलचा मोझम्मील खलील तसेच गोंदिया येथील साकेत पब्लिक स्कूलच्या भारती बजाज या विद्यार्थिनीने विदर्भात अव्वल क्रमांक पटकाविला आहे. दोघांनाही ९९ टक्के गुण ( १० सीजीपीए) मिळाले आहेत. सेंट्रल इंडिया पब्लिक स्कूलच्याच कोमल कुशवाहा या विद्यार्थिनीने ९८.४ टक्के गुणांसह दुसरे स्थान पटकाविले आहे. सीबीएसईच्या निकालात दरवर्षीप्रमाणे यंदादेखील मुलींनीच बाजी मारल्याचे चित्र असून, निकालाची टक्केवारीदेखील वाढल्याचा दावा शाळांकडून करण्यात आला आहे. नागपुरातील भवन्स विद्यामंदिर, सिव्हिल लाईन्स येथील सौंदर्या जनार्दन व नारायणम् विद्यालयाच्या जिज्ञासा बडवाईक या विद्यार्थिंनींनी संयुक्तपणे दुसरा क्रमांक पटकाविला आहे. या दोघींनाही ९८.२ टक्के गुण आहेत.दहावीचा निकाल सोमवारी संध्याकाळी उशिरा लागला. अचानक जाहीर झालेल्या या निकालामुळे विद्यार्थ्यांसोबतच पालक व शाळा प्रशासनाची धावपळ झाली. ‘आॅनलाईन’ निकालात केवळ ‘सीपीजीए’ दिसत असल्यामुळे नेमके गुण जाणून घेण्यासाठी अनेक विद्यार्थ्यांनी शाळांमध्ये धाव घेतली. शाळांतील शिक्षक व कर्मचार्‍यांनीदेखील रात्री उशिरापर्यंत थांबून संपूर्ण निकाल ‘डाऊनलोड’ करून घेतला, हे विशेष.