होळी साजरी करताना काळजी घ्या

लोकमत न्यूज नेटवर्क

नागपूर : होळीच्या उत्सवाला विजेच्या अपघाताने गालबोट लागू नये, यासाठी होळी पेटविताना संभाव्य अपघात टाळण्याकरिता आवश्यक ती खबरदारी घेत होळी साजरी करा.

होळी पेटविताना सभोवताली वीजवाहिन्या किंवा वितरण रोहित्रे नाहीत याची खातरजमा करून घ्या, अन्यथा होळीच्या ज्वाळांनी वीजवाहिन्या वितळून जिवंत तार खाली पडून भीषण अपघात होण्याची शक्यता असते. याशिवाय अनेक ठिकाणी वीजवाहिन्या या भूमिगत असल्याने, त्यापासून लांब अंतरावरच होळी पेटवावी, जेणेकरून होळीच्या उष्णतेपासून भूमिगत वीजवाहिन्या सुरक्षित राहतील. होळी पेटविताना शक्यतो मोकळ्या जागेचा वापर करा. ट्रक किंवा इतर वाहनातून होळीचे लाकडे आणताना स्पर्श रस्त्यालगतच्या वीजवाहिन्यांना होणार नाही, याची खबरदारी घ्या. विजेचे अपघात हे प्राणघातक असल्याने एक चूकही प्राणांकित अपघातास कारणीभूत ठरू शकते.

त्याचप्रमाणे रंगोत्सव साजरा करताना पाण्याचे फवारे वीजवाहिन्यापर्यंत उडणार नाही, याची काळजी घ्या. रंग भरलेले फुगे फेकताना ते विजेचे खांब आणि वीजवाहिन्या यांना लागणार नाही, याची खबरदारी घ्या. ओले कपडे, ओल्या चिंध्या विजेच्या तारावर फेकण्याचे टाळावे, कारण अशा ओल्या कपड्यांमुळे दोन फेजमध्ये शॉर्टसर्किट होऊन वीज पुरवठा खंडित होतो. तसेच वीजवाहिन्यावर-तारांवर अशा कपड्यांमुळे पावसाळ्यात दोन फेजमध्ये शॉर्टसर्किट होऊन वीज पुरवठा खंडित होतो. विशेषत: बालकांना रंगोत्सव साजरा करताना सांभाळून व मोठ्यांच्या निगराणीखाली वीजयंत्रणापासून लांब ठेवून साजरा करू द्यावा. वीज वितरण यंत्रणेची रोहित्रे व तत्सम वितरण उपकरणे बसविलेल्या जागेपासून लांब अंतरावरच रंग खेळा. रंग खेळताना ओल्याचिंब शरीराने वीजखांबाला स्पर्श झाल्यास अपघाताचा संभाव्य धोका असल्याने विजेच्या खांबांना स्पर्श करू नका. विजेच्या खांबासभोवती पाण्याचा निचरा होणार नाही, याची खबरदारी घ्या.