नागपूरच्या व्यावसायिकासोबत दिल्लीच्या ठगाची बनवाबनवी

ई-मेल आयडी हॅक करून रक्कम लंपास :

सदरमध्ये गुन्हा दाखल

लोकमत न्यूज नेटवर्क

नागपूर : एका व्यावसायिकाचा ई-मेल आयडी हॅक करून सायबर गुन्हेगाराने व्यावसायिकाच्या कर्मचारी महिलेला थाप मारली आणि चार लाख ८० हजार रुपये लंपास केले. सदर पोलिस ठाण्यात या प्रकरणी बुधवारी गुन्हा दाखल झाला.

नरेश ग्रोवर यांची सदर पोलीस ठाण्याच्या हद्दीत ग्रोवर इन्फोटेक लिमिटेड नावाने फर्म आहे.

येथे संध्या नीतेश सूर्यवंशी काम करतात. १५ नोव्हेंबरला दुपारी १२ च्या सुमारास विशाल ठाकूर नामक सायबर गुन्हेगाराचा त्यांना मेल आला. हा मेल ग्रोवर यांनी केल्याचे त्याने भासवले. ‘मी मीटिंगमध्ये आहे. मला कॉल करू नका. तातडीने चार लाख ८० हजार रुपयांची आवश्यकता आहे’, असे सांगून सायबर गुन्हेगाराने सूर्यवंशी यांना चार लाख ८० हजार रुपयांचे ट्रांजेक्शन करण्यास संध्या सूर्यवंशी यांना भाग पाडले. दरम्यान, काही दिवसानंतर हा व्यवहार लक्षात आल्याने ग्रोवर यांनी सूर्यवंशी यांच्याकडे विचारणा केली असता त्यांनी १५ नोव्हेंबरला तुम्ही मेल केला होता, त्यानुसार हा व्यवहार केल्याचे सांगितले. ग्रोवर यांनी बँक खाते तपासले असता आरोपी विशाल ठाकूर याने नवी दिल्लीतील आयसीआयसीआय बँकेच्या खात्यातून चार लाख ८० हजार रुपयांची रक्कम आपल्या खात्यात वळती करून घेतल्याचे उघड झाले. सायबर गुन्हेगारांनी ही फसवणूक केल्याचे लक्षात आल्यानंतर त्यांनी सूर्यवंशी यांच्या माध्यमातून पोलिसांकडे तक्रार नोंदविली. सदर पोलिसांनी गुरुवारी या प्रकरणात फसवणूककीचा गुन्हा दाखल केला. आरोपीचा शोध घेतला जात आहे.

---