लोकमत न्यूज नेटवर्क
नागपूर : विदर्भाचे सुपुत्र व मुंबई उच्च न्यायालयाचे वरिष्ठ न्यायमूर्ती अतुल चांदूरकर यांची गुरुवारी सर्वोच्च न्यायालयाच्या न्यायमूर्तीपदी नियुक्ती करण्यात आली. सर्वोच्च न्यायालयाच्या कॉलेजियमने यासंदर्भात गेल्या सोमवारी केलेली शिफारस केंद्र सरकारद्वारे मंजूर करण्यात आली.
न्या. चांदूरकर यांची दि. २१ जून २०१३ रोजी मुंबई उच्च न्यायालयामध्ये अतिरिक्त न्यायमूर्तीपदी नियुक्ती करण्यात आली होती. त्यानंतर २ मार्च २०१६ रोजी त्यांना सेवेत कायम करण्यात आले. त्यांनी पुणे येथील सेंट व्हिन्सेंट हायस्कूलमधून शालेय शिक्षण व नेस वाडिया महाविद्यालयातून पदवी शिक्षण पूर्ण केले तर, आयएलएस विधी महाविद्यालयातून एलएल.बी. पदवी प्राप्त केली आहे. त्यांनी दि. २१ जुलै १९८८ पासून मुंबई येथील वरिष्ठ ॲड. बी. एन. नाईक यांच्या मार्गदर्शनाखाली वकिली व्यवसायाला सुरुवात केली. पुढे ते १९९२ मध्ये नागपुरात स्थायिक झाले. त्यांनी येथील विविध न्यायालयांमध्ये वकिली करताना संवैधानिक, दिवाणी, फौजदारी, प्रशासकीय असे विविध प्रकारचे विषय प्रभावीपणे हाताळले. यापूर्वी विदर्भातून न्या. मोहम्मद हिदायतुल्ला, न्या. जनार्दन मुधोळकर, न्या. ए. पी. सेन, न्या. विकास सिरपूरकर, न्या. शरद बोबडे व न्या. भूषण गवई यांची सर्वोच्च न्यायालयाच्या न्यायमूर्ती पदी नियुक्ती झाली आहे. यापैकी न्या. हिदायतुल्ला व न्या. बोबडे यांनी सरन्यायाधीश पद भूषविले व सध्या न्या. गवई सरन्यायाधीशपदी कार्यरत आहेत.