व्यसन भागविण्यासाठी चोरी करणारे जेरबंद

लोकमत न्यूज नेटवर्क

नागपूर - व्यसन भागविण्यासाठी चोरी-घरफोडी करणाऱ्या दोन सराईत गुन्हेगारांना नंदनवन पोलिसांनी ताब्यात घेतले. त्यांच्याकडून चोरी आणि घरफोडीच्या दोन गुन्ह्यांचा छडा लावला. तसेच चोरीची मोटरसायकल आणि मोबाईलही जप्त केला. सरफराज ऊर्फ सुरू शेख मोहम्मद शाैकत शेख (वय २२, रा.नंदनवन) आणि गजानन रामदास टेकाम (वय २२, रा. प्रजापतीनगर) अशी आरोपींची नावे आहेत.

बुधवारी दुपारी १.३० च्या सुमारास हे दोघे गोपालकृष्णनगरातील शितला माता मंदिराजवळून एक हिरोहोंडा ढकलत नेत होते. गस्तीवरील नंदनवन पोलिसांना त्यांचा संशय आला. त्यामुळे पोलिसांनी विचारणा केली असता ते गोंधळले. त्यामुळे पोलिसांनी त्यांना ठाण्यात नेऊन चौकशी केली असता ते सराईत गुन्हेगार असल्याचे उघड झाले. एक महिन्यापूर्वी त्यांनी विद्यानगरात घरफोडी करून रोख रक्कम तसेच डीव्हीआर चोरून नेला होता. तर काही दिवसांपूर्वी रस्त्यावर दारूच्या नशेत पडलेल्या व्यक्तीची हिरो होंडा आणि मोबाईल चोरल्याची कबुली दिली. आरोपी सरफराज आणि टेकामला दारू तसेच अमली पदार्थांचे व्यसन आहे. ते भागविण्यासाठी हे दोघे नेहमीच चोरी, घरफोडीचे गुन्हे करतात, असेही तपासात उघड झाले.

---

ठिकठिकाणी गुन्हे दाखल

आरोपी टेकामविरुद्ध बजाजनगर, वाठोडा, नंदनवनसह चंद्रपूरमध्येही अशा प्रकारचे गुन्हे दाखल आहेत. त्यांच्याकडून आणखी काही गुन्हे उघड होतात का, त्याची नंदनवनचे ठाणेदार सांदीपान पवार यांच्या नेतृत्वात हवालदार संजय साहू, नायक संदीप गवळी, भीमराव ठोंबरे, विनय करुडकर, रवींद्र दोडके, विनोद झिंगरे आणि प्रेम खैरकर हे तपास करीत आहेत.

----