‘रिफंड’साठी रेल्वे प्रवाशांना मनस्ताप

नागपूर : कोरोनाचे रुग्ण सातत्याने वाढत असल्यामुळे अनेक प्रवासी आपले तिकीट रद्द करीत आहेत. परंतु तिकिटाची रक्कम परत घेण्यासाठी (रिफंड) त्यांना मनस्ताप होत आहे. रेल्वेजवळ पैसे उपलब्ध नसल्याचे सांगून त्यांना दुसऱ्या रेल्वेस्थानकावर पाठविण्यात येत आहे. यामुळे प्रवाशांचा वेळ वाया जात असल्याची स्थिती आहे.

इतवारी रेल्वेस्थानकावर गुरुवारी प्रवाशाला पैसे उपलब्ध नसल्याचे सांगून नागपूर रेल्वेस्थानकावर जाण्यास सांगण्यात आले. नागपूर रेल्वेस्थानकावरही पैसे मिळत नव्हते. अर्ध्या तासानंतर दुसऱ्या काऊंटरवरून त्यांना पैसे देण्यात आले. मागील वर्षी मार्च महिन्यापासून कोरोनाचा प्रादुर्भाव सुरू झाला. त्यामुळे रेल्वेगाड्या बंद करण्यात आल्या. कोरोनाचा प्रादुर्भाव कमी झाल्यानंतर सप्टेंबर महिन्यापासून रेल्वेगाड्या सुरू करण्यात आल्या. त्यामुळे प्रवाशांनी आरक्षण करणे सुरू केले. परंतु अचानक पुन्हा कोरोनाच्या रुग्णांची संख्या वाढत असल्यामुळे प्रवासी आपली तिकिटे रद्द करीत आहेत. परंतु पैशासाठी त्यांना एका रेल्वेस्थानकावरून दुसऱ्या रेल्वेस्थानकावर पाठविण्यात येत असल्यामुळे प्रवाशांचा वेळ वाया जाऊन त्यांना मनस्ताप होत आहे. तिकिटाची रक्कम देण्यासाठी प्रवाशांना परत पाठविणे चुकीचे आहे. प्रवासी ज्या रेल्वेस्थानकावर गेला तेथे तिकिटाची रक्कम परत देण्याची गरज असल्याचे मत भारतीय यात्री केंद्राचे अध्यक्ष बसंत कुमार शुक्ला यांनी व्यक्त केले.

............

प्रवाशाने सांगितली आपबिती

इतवारीत राहणारे राकेश चड्डा यांनी सांगितले की, त्यांनी २७ मार्चला नागपूर-अमृतसर जाणारी रेल्वेगाडी क्रमांक ०२०२५ या गाडीचे तिकीट काढले होते. त्याची किंमत १२ हजार रुपये झाली. परंतु कोरोनाचे रुग्ण वाढत असल्यामुळे त्यांनी प्रवास रद्द करण्याचा निर्णय घेतला. इतवारीला तिकीट रद्द करण्यासाठी गेल्यानंतर त्यांना एक तास थांबवून पैसे नसल्यामुळे नागपूर रेल्वेस्थानकावर जाण्याचा सल्ला देण्यात आला. नागपूर रेल्वेस्थानकावरही अर्धा तास वाट पाहिल्यानंतर त्यांना तिकिटाची रक्कम देण्यात आली.

................