मृतांच्या डीएनए सॅम्पलचे विश्लेषण

नरेश डोंगरे।

लोकमत न्यूज नेटवर्क

नागपूर : अनैतिक संबंधामुळे निर्माण झालेल्या विकृतीतून घडलेल्या पाचपावलीच्या हत्याकांडातील अनेक नाजूक मुद्दे अजून गुलदस्त्यातच आहेत. त्याचा उलगडा करण्यासाठी आरोपीसह सहाही मृतांचे डीएनए सॅम्पल घेऊन पोलिसांनी ते विश्लेषणासाठी फॉरेन्सिक तज्ज्ञांकडे पाठविले आहेत. यातून पोलीस आरोपी, तसेच मृतांच्या नात्यातील गुंतागुंत तपासणार आहेत.

पाचपावलीतील बागल आखाड्याजवळच्या भागात भिशीकर यांच्या घरी राहणारा क्रूरकर्मा आलोक ऊर्फ चंदू अशोक मातूरकर याने त्याची मेव्हणी अमिषा, सासू लक्ष्मीबाई बोबडे, पत्नी विजया, मुलगी परी आणि साहिल नामक मुलाची अत्यंत निर्घृणपणे हत्या केली. रविवारी मध्यरात्रीनंतर घडलेल्या या थरारक हत्याकांडाने समाजमन सुन्न झाले आहे. हत्याकांड उघडकीस आल्यानंतर ते घडवून आणणारा आरोपीही परिस्थितीजन्य पुराव्यावरून उजेडात आल्यामुळे आणि त्याने स्वतःला संपवून घेतल्यामुळे पोलिसांना या हत्याकांडात आता फक्त तपासाची कागदोपत्री प्रक्रियाच पूर्ण करावी लागणार आहे. मात्र, या प्रकरणाने माणसातील पाशवी वृत्तीला अधोरेखित केल्यामुळे पोलिसांसाठी हे प्रकरण ‘रिसर्च बेस स्टोरी’ ठरले आहे. आरोपी आलोकचे त्याची मेव्हणी अमिषासोबत अनैतिक संबंध होते. हे दोघे नेहमीच शरीरसंबंध प्रस्थापित करायचे, हे उघड झाले आहे. अमिषा स्वैराचारी बनल्यामुळे आलोक सैतान बनल्याचेही उघड झाले आहे. परिस्थितीजन्य पुराव्यावरून पोलिसांनी हा निष्कर्ष काढला असला तरी यामागे आणखी काही वेगळी ‘स्टोरी’ असावी असेही काही पोलीस अधिकाऱ्यांचे मत आहे. त्याचमुळे पोलिसांनी या प्रकरणाचा तपास सायंटिफिक पद्धतीने करण्यास सुरुवात केली आहे. या पार्श्वभूमीवर, पोलिसांनी आरोपी आलोक, तसेच अन्य पाच मृतांचे डीएनए सॅम्पल घेतले आहेत. ते तज्ज्ञांकडे विश्लेषणासाठी पाठविण्यात आले आहे. आलोकच्या डोक्यात पत्नी आणि मुलांबाबत दुसरा काही संशय होता का, मृत विजया आणि अमिषा या दोघी किंवा दोघींपैकी कुणी गर्भवती होते का, हे आणि आणखीही असेच काही नाजूक पैलू पोलीस डीएनए टेस्टच्या माध्यमातून उलगडण्याचा प्रयत्न करीत आहेत.

---

बलात्काराचा उल्लेख नाही

या हत्याकांडाला आता तीन दिवस झाले. मात्र, डॉक्टरांकडून पोलिसांना अजून फायनल पीएम रिपोर्ट मिळालेला नाही. डॉक्टरांनी प्रायमरी रिपोर्ट दिला, त्यात चौघांचा मृत्यू गळा कापल्यामुळे, तर साहिलचा मृत्यू तोंडावर उशी दाबल्याने श्वास गुदमरल्यामुळे झाल्याचे स्पष्ट केले आहे.

अमिषाचा मृतदेह पोलिसांना नग्नावस्थेत आढळला. तिचे आणि आरोपीची अंतर्वस्त्रे बाजूला पडून होती. त्यावरून त्याने अमिषाशी शरीरसंबंध प्रस्थापित केल्याचा अंदाज पोलीस अधिकाऱ्यांनी काढला आहे. मात्र, प्रायमरी रिपोर्टमध्ये बलात्कार किंवा शरीरसंबंध याबाबतचा खुलासा झालेला नाही. फायनल रिपोर्टमध्ये त्याबाबत वैद्यकीय तज्ज्ञ आपले मत नोंदविणार असल्याचे समजते.

---